«Astana Opera» gala baletke qyzý daıyndyq ústinde
ASTANA. QazAqparat - 21 maýsym kúni «Astana opera» teatrynyń úlken zalynda Reseıdiń Halyq ártisi, Marıınskıı teatrynyń jáne aǵylshyn Koroldigi baletiniń prıma balerınasy, búginde «Astana Opera» balettik trýppasynyń kórkemdik jetekshisi Altynaı Asylmuratova balettik trýppanyń dırektory, QR Eńbek sińirgen qaıratkeri Tursynbek Nurqalıevpen birigip, Gala balet ótkizedi, dep habarlady teatrdyń baspasóz qyzmetinen.
Balerına Altynaı Asylmuratova mansap jolynda álemge esten ketpes horeografııalyq keıipkerlerdi pash etken. Kórkemdik jetekshi retinde keıin halyq ártisi kóptegen óner shańyraǵynda klassıkanyń marjandary - asa kórnekti horeograftar dúnıege ákelgen balettik nomerlerdi aınytpaı shyǵardy. - Gala baǵdarlamasyna biz buryn-sońdy «Astana Opera» sahnasynda kórsetilmegen nomerlerdi qostyq. Biz ázirlep jatqan shyǵarmashylyq jumys kórermenimizge trýppamyzdyń jas ártisterin jańa qyrynan ashsa deımiz, - deıdi Altynaı Asylmuratova. Eki bólimnen turatyn bir jarym saǵattyq baǵdarlamada dýetter, trıo, pa-de-de, gran-pa eń áıgili ári súıikti baletterden úzindiler usynylady, olar: I. Baıerdiń «Qýyrshaqtar perisi», N. Rımskıı-Korsakovtyń «Shaherazadasy», F. Shopenniń mýzykasyna qoıylǵan «Elestegi baly», S. Rahmanınovtiń «Kóktemgi sýlar», L. Mınkýstyń «Don Kıhoty», B. Asafevtiń «Parıj jalyny», K. Sen-Sanstyń «Ólip bara jatqan aqqýy», A. Borodınniń «Igor knıaz» operasynan «Qypshaqtar bıi», Ǵalııa Bóribaevanyń qoıylymyndaǵy K. Kúmisbekovtiń mýzykasyna shyǵarylǵan «Bıshi qaıyń» bıi jáne basqalary. Ártister qoıylatyn nomerlerdegi árbir qımylǵa uzaq ári jiti daıyndaldy. Áli tym jas bıshiler balettiń tájirıbeli ártisteri: Mádına Baspaeva, Gaýhar Ýsına, Taıyr Gataýov, Jandos Áýbákirov, Áıgerim Beketaeva, Ánel Rústemova, Baqtııar Adamjan, Arman Orazov, Ásel Qusaıynova, Serik Naqyspekov, Eldar Sársembaev, Gúlzıra Jantemir, Marat Ábdirahmanov, Nazerke Aımuhametovalarmen bir qatarǵa turyp óner kórsetedi. - Baǵdarlamada qyzyqty nomer kóp. Ár jańa kontsert saıyn onyń mazmuny ózgerip otyrady, jáne, aıtalyq, kórermen osy jobany tamashalamasa, kelesi joly kóre almaıtynyn atap óteıin. Sol sebepti, jiberip almańyzdar, - deıdi sózin túıindegen Altynaı Asylmuratova. Kórermen jańa nomerlermen qatar, sahnanyń jańa jabdyqtarynan, dızaınyna deıin «Astana Opera» tigin tsehynyń qyzmetkerleri daıyndaǵan jańa kostıýmderden áser alady. - Biz ázirlegen nomerlerdiń kostıýmderinde usaq-túıekter ózgeriske ushyrady, ásirese «Shaherezada» nomeriniki, degenmen jalpy alǵanda kostıýmder spektaklderdegi túpnusqalyq qalpyn saqtap qaldy. Túsin tańdaǵan kezde názik romantıkalyq reńderdi: ashyq kógildirdi, ashyq qyzǵyltty jáne kógildirdi tańdadyq, - deıdi dızaıner Ásel Dosmuratova.
