«Astana Opera» Eýropaǵa gastroldik saparmen barady
ASTANA. QazAqparat - «Astana Opera» 22 jáne 23 jeltoqsan kúnderi Majarstanǵa jol tartady. Teatr trýppasy el astanasy Býdepeshtte jáne Pech qalasynda óner kórsetpek, dep habarlaıdy QazAqparat teatrldiń baspasóz qyzmetine silteme jasap.
Qyzyqty kontserttik baǵdarlamany Ferents Lıst Mýzykalyq akademııasynyń ataqty kontsert zalynda jáne uly majar kompozıtory Zoltan Kodaı atyndaǵy áıgili kontsert zalynda usynady (Kodaly Center, Pech).
Kórermenge ulttyq jáne álemdik klassıkalyq repertýar nómirleri usynylady.
«Gastrolderimiz «Rýhanı jańǵyrý» baǵdarlamasy aıasynda ótedi. «Bolashaqqa baǵdar: rýhanı jańǵyrý» maqalasynda Elbasy «Jahandaǵy zamanaýı qazaqstandyq mádenıet» jobasyna bastamashylyq etti. Ártister qazaq halqynyń rýhanı qundylyqtary, ult rýhy beınelengen ulttyq jádigerlerdi oryndaıdy. Maqsatymyz - mádenıetimizge kópshiliktiń nazaryn aýdartyp, Qazaqstanǵa kelýge nıet bildiretin jańa dostar men óner súıer qaýymǵa ıe bolý. Teatr trýppasy tolyq quramda usynylady. Kórermenniń aldyna «Astana Operanyń» Hory da shyǵady. Teatr maqtanyshy - opera solısteri men balet ártisteri - eńbegi sińgen halyqaralyq bedelge ıe, olar turaqty túrde álemniń úzdik sahnalarynda óner kórsetýde. Olar Eýrazııa kindiginde ornalasqan «Astana Opera» teatry ártúrli baǵytta jumys jasaı alatyndyǵyn kórsete otyryp, eýropalyq klassıkany da oryndaıdy», - dedi Qazaqstannyń eńbek sińirgen qaıratkeri, «Astana Opera» teatrynyń dırektory Ǵalym Ahmedııarov.
Qazirgi tańda «Astana Opera» teatrynda úzdik ártister men mýzykanttar toǵysqan, sonymen qatar trýppa quramynda sheteldik ártister de bar.
Gastroldik baǵdarlamaǵa ataqty qazaqstandyq kompozıtorlardyń týyndylary - T.Qajyǵalıevtiń «Dala ańyzy», M.Tólebaevtyń «Aıtysy», «N.Tilendıevtiń «Álqıssa» kúıi, E.Rahmadıevtiń «Qamar sulý» operasynan Qamar men Ahmettiń dýeti, A.Jubanov pen L.Hamıdıdiń «Abaı» operasynan «Qarlyǵash» bıi engen. Sonymen birge Dj.Verdıdiń «Trýbadýr» operasynan graf Dı Lýna men Leonoranyń dýeti, Dj.Rossınıdiń «Semıramıda» operasynan Semıramıdanyń kavatınasy oryndalady. Keshtiń kórkin «V mıre est krasavıtsa odna» atty majar áni asha túsip, N.Nazarbaevtyń sózine jazylǵan «Jerim meniń» kompozıtsııasymen kontsert óz máresine jetedi.
Kontsertke kóptegen álemdik sahnany baǵyndyrǵan solıster qatysady: qazaqstandyq opera dıvasy, teatrdyń jetekshi solısi Maıra Muhamedqyzy - parıjdik «Grand Operada» Qazaqstan atynan shyqqan alǵashqy ári jalǵyz solıst. Opera prımasy Saltanat Ahmetova - «Bolshaıa opera» televızııalyq jobasynyń jeńimpazy. Teatrdyń sózsiz jarqyn jetekshi solısi Jupar Ǵabdýllına álemniń kóptegen teatr tyńdarmandarynyń júregin jaýlaǵan. Tyńdaýshylar nazaryna ol Odabella arııasyn usynbaq. Keremet tenor Nurlan Bekmuhambetov F.Legardyń «Strana ýlybok» operettasynan hanzada Sý Chongtyń arııasyn usynbaq. Teatr solısteri Málıka Mınızını men Bıbigúl Januzaq Jak Offenbahtyń «Barkarola» ánin ázirleýde.
Sonymen qatar kontsertke opera repertýaryn keremet oryndaýshylar men «Astana Opera» teatry balet trýppasynyń shoq juldyzdary qatysady, olar: Baqtııar Adamjan - kóptegen halyqaralyq baıqaýlardyń júldegeri, onyń sahnadaǵy áriptesi - «Astana Operanyń» jetekshi solısi, Borıs Eıfmannyń Sankt-Peterbýrg memlekettik akademııalyq balet teatrynyń shaqyrylǵan solısi Áıgerim Beketaeva, sondaı-aq sahna tórine «Astana Operanyń» jetekshi balet solısi, Bordo teatrynyń (Frantsııa) shaqyrylǵan solısi Mádına Basbaeva jáne t.b. shyǵady.
Dırıjerlik pýlt basynda «Astana Operanyń» bas dırıjeri - álemge áıgili maestro Alan Bóribaev, sonymen qatar Aıdar Ábjahanov turady.
Ujym 22 jeltoqsanda Pech qalasyndaǵy alǵash óner kórsetse, 23 jeltoqsanda ártister majar astanasy - Býdapeshtte kontsert beredi.
