«Astana Opera» elordalyqtarǵa «Armysyń, áz Naýryz!» kontsertin tartý etedi (FOTO)

ASTANA. QazAqparat - Kóktemgi jańarý, qaıta túleý, dostyq pen birlik merekesine oraı «Astana Opera» teatrynyń negizgi sahnasynda 22 naýryzda «Armysyń, Áz Naýryz!» saltanatty sharasy ótedi, dep habarlanǵan teatrdyń saıtynda.

Kontsertte qazaqtyń opera óneriniń bastaýynda turǵan kompozıtorlardyń shyǵarmalary usynylady, atap aıtsaq kórermenge A. Jubanov pen L. Hamıdıdiń «Abaıy», M. Tólebaevtiń «Birjan-Sarasy», E. Brýsılovskııdiń «Qyz Jibegi», S. Muhamedjanovtyń «Aısulýy», E. Rahmadıevtiń «Qamar Sulýy» syndy týyndylar tartý etilmek. Munymen qatar baǵdarlamada kópultty elimizdegi qaýymdardyń mádenıetin pash etetin, álemdik mýzykalyq klassıka men kompozıtsııa jaýharlary qamtylady. Saltanatty keshtiń ajaryn «Astana Opera» teatrynyń tamasha solısteri, balet juldyzdary, sımfonııalyq orkestriniń daryndy mýzykanttary men hory ashady. «Astana Opera» teatrynyń rejısseri Natalıa Kagadıı merekelik shara jaıly bólisti. - Negizinen kontsertimiz úsh bólimnen turady. Bul, birinshi kezekte, ulttyq klassıkalyq repertýar. 2015 jyl Qazaqstan halqy Assambleıasynyń jyly bolyp jarııalanǵandyqtan, kelesi bólimde orystyń, ýkraınnyń, bashqurttyń, tatardyń, armıannyń mýzykasy usynylady. «Astana Opera» - bul klassıkalyq teatr, sol sebepti úshinshi bólim álemdik klassıkalyq mýzykanyń tańdaýly týyndylaryna arnalady. Kontsertti meıramǵa oraı mańyzdy ulttyq bıimiz - «Mereke bıi» aıaqtaıdy. Biz qonaqjaı, berekeli Otanymyzdyń rýhanı baılyǵyn, óneriniń joǵary deńgeıin kórsetkimiz keledi, - deıdi óner sheberi. Al «Astana Opera» teatrynyń dırektory Tóleýbek Álpıev kóktemgi Naýryz merekesimen barsha qazaqstandyqtardy quttyqtady. - Bul merekeniń túp-tamyry sonaý adam balasynyń jazba dáýirine deıingi tarıhynda jatyr. Halyqaralyq ıÝNESKO uıymynyń sheshimimen ol adamzattyń mádenı murasynyń qataryna endi. «Astana Opera» teatry astanalyq turǵyndar men qonaqtarǵa, álemdik mýzykalyq klassıkanyń qazynasynan oryn tepken qazaq halqynyń mýzykalyq murasynyń eń úzdik úlgilerimen esten ketpes kezdesý syılaıdy. Osy bir tamasha kúnde barshańyzǵa tilerim - otbasyńyzda beıbitshilik pen birlik uıalasyn, al kóńilderińizde tamasha mýzyka qalyqtasyn! - dedi Tóleýbek Nyǵmetuly. Kontsert eki bólimnen turady, saǵat 19:00-de bastalady.