«Astana Opera» búldirshinderdi ishekti aspaptar týraly qoıylymymen qýantpaq
ASTANA. QazAqparat - 26 qazanda «Astana Opera» teatrynyń kameralyq zalynda alǵash ret «Teatrǵa saıahat» balalar abonementi aıasynda qazaq jáne orys tilderinde «Tatý-tátti ishekti jáne basqa aspaptar otbasy» atty kontsert ótedi, dep habarlaıdy teatrdyń baspasóz qyzmetinen.
Teatrlandyrylǵan qoıylym-kontsert kishkentaı tyńdarmandy ishekti aspaptardyń qalaı paıda bolǵanymen, sondaı-aq olardyń qalaı qurylǵanymen tanystyrady. Klassıkalyq aspaptar halyq aspaptarynan bastaý alatyny belgili, keshte olardyń da dybysy qalaı shyǵatynyn estip-bilýge bolady. Mýzyka álemine saıahat kóńildi qyzdyratyn gıtaranyń jáne ásem arfanyń dybysymen kórinis bermek. Jas kórermenge olardyń qurdastary jeke aspapta oryndaıtyn nómirlerden tosynsyı ázirledi. Munymen qatar baǵdarlamany «Mazýrka» jáne «Polonez» bıleri túrlendiredi.
Sharanyń negizgi maqsaty - óskeleń urpaqtyń klassıkalyq mýzyka jáne mýzykalyq aspaptar jaıly bilimin jetildirý.
«Biz kishkentaı kórermendi aldymen aspaptardyń únimen tanystyryp, sodan keıin mýzykalyq janrlarǵa kezek bereıik dep sheshtik. Teatrdyń bolashaq kórermenin qandaı etip tárbıeleıtinimiz kóbinese bizdiń búgingi júrgizip jatqan jumystarymyzǵa, olarǵa qandaı repertýar usynatynymyzǵa baılanysty. Osy turǵydan alǵanda, balalarǵa mýzyka jaıly dárister oqý paıdaly bolady dep esepteımin. Teatrǵa búkil otbasymen kelgenge yńǵaıly bolsyn dep biz mundaı kontsertterdi demalys kúnderi ótkizemiz», - deıdi mýzykatanýshy Sáýle Máýletova.
16 qarashada ótetin kelesi kontsert úrlemeli jáne urmaly aspaptarǵa arnalady. Odan keıin kórermen nazaryna S.Prokofevtiń «Petıa men qasqyr» sımfonııalyq ertegisi usynylady. Teatr josparynda «Túrli mýzykalyq daýystar» dep atalatyn kontsertter serııasyn ótkizý de bar, mundaǵy maqsat - aýdıtorııany vokaldyq daýystyń túrlerimen tanystyrý.
