«Astana Opera» «Bogema» mahabbat jyryn jyrlamaq
ASTANA. QazAqparat - 29 qyrkúıekte «Astana Opera» teatrynda alǵashqy mahabbat, sheksiz shattyq pen saýyq-saıran, jalyndaǵan jastyq shaq jaıly «Bogema» spektakli qoıylady, dep habarlady teatrdyń baspasóz qyzmetinen.
«Dj. Pýchchınıdiń jastarǵa arnalǵan názik mýzykasy er men áıeldiń qarym-qatynasyn jetkizedi. Ǵajaıyp Mımıdiń rólinde ádemi de, keń daýysy týlaǵan - Aıgúl Nııazova. Sezimtal Saltanat Ahmetova syńǵyrlaǵan ashyq daýysty Mıýzettanyń partııasyn shyrqaıdy. Sarqylmas sezimge toly atmosferany jetkizetin teńdesi joq akterlar quramynda osy operany ataqty ıtalıandyq «Arena-dı-Verona» teatrynda basty partııalarda oınaıtyn Medet Shotabaev (Rýdolf) pen Súndet Baıǵojın (Marsel) bar. Evgenıı Chaınıkov Shonar partııasyn, Artýr Qaıypqulov Kollendi shyrqaıdy. Dırıjerlyq tizginde - QR Eńbek sińirgen qaıratkeri Abzal Muhıtdınov», delingen habarlamada. Operadaǵy kórinis Parıjde, Latyn kvartalynda órbıdi. Qańǵybastyń kúıin keshken Parıj kóshelerin mekendegender sahnaǵa aǵashaıaqpen shyǵyp, muńsyz qyzdar qaljyńdap, kóńil kóteredi. Operada kóbine ómirleri qaıǵyly keletin óner adamdarynyń taǵdyry baıandalady. Sıýjet jazylmaıtyn aýrýǵa shaldyqqan Mımıdi keziktiretin kedeı aqyn Rýdolftiń mahabbaty jaıly jáne Marsel esimdi sýretshi men onyń jeńiltek dos qyzy Mıýzettanyń hıkaıasyn kórsetpek.
