Astana Opera bıylǵy maýsymyn Alan Bóribaevtyń baǵdarlamasymen aıaqtaıdy
Bul kontsert tyńdarmanǵa bir gala-opera aıasynda jıyrmadan asa tanymal, sondaı-aq frantsýz kompozıtorlarynyń óte sırek oryndalatyn jaýharlarymen tanysýǵa múmkindik beredi. Barlyq shyǵarmalar XIX ǵasyrdaǵy frantsýz mádenı ómirimen ózara tyǵyz baılanysty.
«Bul joba – XIX ǵasyrdyń frantsýz romantıkalyq operasy sekildi shoqtyǵy bıik mádenı qubylysty búkil kesh boıy qamtýǵa jasaǵan shyǵarmashylyq talpynys. Bul uǵymnyń keńdigi sonsha, osynaý jalpylanǵan termınniń ishinde ol kóptegen baǵyttarǵa bólinedi. Gýnonyń «Faýst», Bızeniń «Karmen» nemese Delıbtiń «Lakme» sekildi úsh ataqty frantsýz operasyn atasaq ta, olardyń romantızm, realızm jáne orıentalızm sekildi túrli aǵymdardy bildiretinin kóremiz. Bizdiń kontsertimizde usynylǵan barlyq kompozıtorlardy ne biriktiredi desek, ol joǵary talǵamǵa, tapqyrlyqqa, kemeldikke, máner kórkemdigine, áýen ásemdigine, dramalyq kórinisterdiń kóztartarlyǵyna, áýendi ári úılesimdi aınalymdardyń tóldaralyǵyna qushtarlyq. Máselen, uly Jorj Bıze sózge ekpindi durys túsirmegende sóz ózi shyǵarǵan áýenge «qonyp» tursa, ol áýen úshin ekpindi solaı qate kúıinde qaldyra salady. Biraq joǵaryda aıtyp ótkenimdeı, úırenshikti bolmaý – frantsýz operasy máneriniń eń mańyzdy quraýshy tustarynyń biri», – deıdi Alan Bóribaev.
Aıta ketý kerek, Qazaqstan men Frantsııany, ásirese Parıjdi berik shyǵarmashylyq kópirler baılanystyrady. Ámire Qashaýbaevtyń 1925 jyly Parıjdegi óner kórsetýin eki eldiń mádenı qatynastarynyń bastaýy dep esepteýge bolady. Ol bizdiń ónerimizdi eýropalyq sahnada tanystyrǵan alǵashqy qazaqstandyq oryndaýshy atandy.
Parıjde uly qazaq oıshyly Abaı, Jambyl Jabaev, Muhtar Áýezovtiń mereıtoılary da ótken bolatyn, sondaı-aq ıÝNESKO-nyń shtab-páterinde qazaqtyń uly kompozıtory Ahmet Jubanovtyń 100 jyldyq mereıtoıy ótti, oǵan Alan Bóribaevtyń ózi dırıjerlik etti.
Al 2014 jyly bas dırıjer Parıjdegi ataqty Champs-Élysées teatrynda A.Jubanov, L.Hamıdıdiń «Abaı» operasynyń frantsýzdyq premerasyn tanystyrdy, ol da maestronyń barlyq jobalary sekildi zor tabyspen ótti.
