«Astana Opera» Beıbitshilik jáne kelisim saraıynda jańa sahnalyq alańyn ashty

ASTANA. KAZINFORM — «Astana Opera» memlekettik opera jáne balet teatry Beıbitshilik jáne kelisim saraıynyń sahnasynda arnaıy balet baǵdarlamasyn usynyp, jańa sahnalyq alańnyń ashylýyn atap ótti. Bul týraly Mádenıet jáne aqparat mınıstrligi habarlady.

Sahnalyq keńistiktiń keńeıýi teatrdyń shyǵarmashylyq qyzmetin odan ári damytýǵa, qoıylymdar sanyn arttyrýǵa jáne mádenı is-sharalardyń jańa formattaryn engizýge baǵyttalǵan. Aldaǵy ýaqytta bul alańda balet jáne opera spektaklderin, gala-kontsertterdi, sondaı-aq túrli bilim berý jobalaryn ótkizý josparlanyp otyr.

Ashylý baǵdarlamasyn teatrdyń balet trýppasynyń kórkemdik jetekshisi, Reseıdiń halyq ártisi Altynaı Asylmuratova jasaqtady. Baǵdarlamaǵa engen qoıylymdar klassıkalyq jáne zamanaýı horeografııalyq ónerdi toǵystyryp, balet dástúriniń sabaqtastyǵyn jáne teatr ujymynyń damýyndaǵy jańa kezeńdi aıqyndaı tústi.

Keshtiń alǵashqy bóliminde kórermen nazaryna Mıhaıl Fokınniń romantıkalyq balettiń kórnekti úlgileriniń biri sanalatyn «Shopenıana» qoıylymy usynyldy. Al ekinshi bólimde horeograf Raımondo Rebektiń ýaqyt fenomenin jáne adamnyń ony qabyldaýyn fılosofııalyq turǵyda zerdeleıtin «Qazirgi sát qansha ýaqytqa sozylady?» baleti kórsetildi. Spektakl barysynda dırıjer tuǵyrynda Rýslan Baımýrzın boldy.

Jańa sahnanyń ashylýy teatr ártisteri úshin de mańyzdy shyǵarmashylyq oqıǵaǵa aınaldy. «Shopenıana» baletinde Alına Zyrıanova alǵash ret № 7 vals partııasynda, al Akbar Imınov Bozbala partııasynda debıýt jasady. Al Raımondo Rebektiń qoıylymynda Doshan Zaıdın Jastyq shaq beınesin tuńǵysh ret sahnaǵa shyǵardy.

Eske salaıyq, «Astana Opera» teatrynda Ermek Serkebaevtyń 100 jyldyǵyna arnalǵan kontsertter legi ótti.