«Astana Opera» barsha astanalyqtar men elorda qonaqtarynyń súıikti óner ordasyna aınalady - M. Qul-Muhammed
ASTANA. 18 maýsym. QazAqparat - «Astana Opera» qalanyń taǵy bir aıshyqty sımvoly ǵana emes, barsha astanalyqtar men elorda qonaqtarynyń súıikti óner ordasyna aınalady.
Bul pikirdi búgin QR Úkimetiniń otyrysynda Mádenıet jáne aqparat mınıstri Muhtar Qul-Muhammed bildirdi.
Onyń paıymynsha, opera jáne balet teatrynyń turǵyzylýy ol salynǵan eldiń mádenıeti salasyndaǵy ǵana emes, búkil álemdik qaýymdastyqtyń mádenı ómirindegi aıtýly oqıǵa retinde baǵalanady. Máselen, damyǵan, baqýatty Eýropanyń ózinde HHІ ǵasyrda nebári 2 opera teatry ǵana salyndy. Onyń alǵashqysy 2005 jyly Kopengagende, al ekinshisi 2008 jyly Oslo qalasynda boı kóterdi.
«Endi birneshe kúnnen keıin óner súıer qaýymǵa esigin aıqara ashatyn «Astana Opera» óziniń klassıkalyq, arhıtektýralyq kelbeti jáne teatrǵa arnalǵan osy zamanǵy tehnıkamen jaraqtandyrylýy jaǵynan ásem Astananyń taǵy bir aıshyqty sımvoly ǵana emes, barsha astanalyqtar men elorda qonaqtarynyń súıikti óner ordasyna aınalatyndyǵyna kámil senemin», - dedi ol.
Mınıstrdiń atap ótýinshe, bul Qazaqstandaǵy opera men balet sııaqty óte kúrdeli qoıylymdardy osy zamannyń eń bıik talaptary turǵysynan júzege asyrýǵa baǵyttalǵan biregeı teatr.
«Óıtkeni opera jáne balet teatrynyń qoıylymdaryna júzden astam adam qatysyp, olardy hor, orkestr jáne balet trýppasy sııaqty ujymdar júzege asyrady», - dedi M.Qul-Muhammed.
