«Astana Opera» baletiniń ártisteri ıtalıandyqtardyń zor qoshemetine bólendi (FOTO)
ASTANA. QazAqparat - «Astana Opera» baletiniń daryndy ártisteri ıtalıandyqtardy tań qaldyrdy, dep habarlaıdy óner ujymynyń baspasóz qyzmeti.
Genýıada 21 qańtarda bolǵan «Spartak» balettik spektakliniń alǵashqy kórsetiliminde eki jarym myńnan astam kórermen uzaq qol shapalaqtap, qoshemet kórsetti.
Sıýjettiń qalaı órbigenin, ártister sheberligin muqııat qadaǵalap otyrǵan kópshilik Baqtııar Adamjanǵa (Spartak) erekshe yqylas bildirdi. Shapalaǵyn aıamaǵan áleýmet, onyń úlken talant ıesi ekenin aıtyp jatty. Ekinshi quramda Spartakty Dosjan Tabyldy somdaıtynyn aıta keteıik, Krasty QR eńbek sińirgen qaıratkeri Taıyr Gataýov oryndasa, Frıgııa - QR eńbek sińirgen qaıratkeri Mádına Baspaeva, al ekinshi kúni Ánel Rústemova bıleıdi, Egına - QR eńbek sińirgen qaıratkeri - Gaýhar Ýsına, al ekinshi quramda Áıgerim Beketaeva oryndaıdy. Balettiń bul jetistigine óziniń asqan sheberligin pash etken korbedalettiń qosqan úlesi de mol.
«Men ártisterdiń ónerine qaıran boldym. Qoıylym keremet, balet tamasha. Basty partııany oryndaǵan bıshiler asqan sheber eken. Biz «Astana Opera» teatrymen yntymaqtastyq qurýǵa múddelimiz jáne tek balet trýppasyna ǵana emes, sondaı-aq operalyq trýppasyna da qyzyǵyp otyrmyz», - deıdi oıymen bólisken «Karlo Felıche» teatrynyń dırektory Maýrıtsıo Roı.
Italıandyq balet súıer qaýym afıshany qalt jibermeı qadaǵalap kelgenin aıtady. «Bul eki sharany nazardan tys qaldyrýǵa bolmaıdy. Búgin biz «Astana Opera» balettik trýppasy usynǵan bıdiń keremettiginen sheksiz lázzat aldyq. Osy arqyly biz qazaq trýppasynyń deńgeıimen tanystyq. Ártisterdiń tehnıkalyq múmkindigine, olardyń akterlyq sheberligine tánti boldyq. Osy keshten keıin «Spartaktyń» áli de ózekti ekenin senimdi túrde aıta alamyz. Biz 23 qańtarda ótetin «Gala Baletke» de barmaqshymyz, nege deseńiz, ulttyq baletti de tamashalaǵan óte qyzyq bolyp tur, sonymen qatar jas balet trýppasynyń uly klassıkterdiń jaýharlaryn qalaı oryndaıtynyn da kórsek deımiz».
«Karlo Felıche» teatrynyń art dırektory, maestro Djýzeppe Akvavıva trýppanyń Genýıaǵa kelýi, qos teatr arasyndaǵy yntymaqtastyqpen baılanysty ekenin atap ótti. - Búgin genýıalyq teatrdyń orkestrine Aıdar Ábjahanov dırıjerlik etti, al hor maestro Pablo Assanteniń jetekshiligimen óner kórsetti. Qazaqstandyq trýppanyń búginde bizde óner kórsetýi - mádenı yntymaqtastyqtyń kórsetkishi.
Gastrol barysynda foıe teatryna qoıylǵan «Ekspo-2017» ekspozıtsııalary basty oqıǵaǵa aınaldy. Kórmeniń taqyryby - «Bolashaq energııasy».
