«Astana Opera» balet trýppasy Slovenııada óner kórsetti
Álemdik balet juldyzy, «Astana Opera» balet trýppasynyń kórkemdik jetekshisi Altynaı Asylmuratova qurǵan gastroldik baǵdarlama eki kúnniń ishinde Krıjanke jazǵy sahnasynda 10 myńǵa jýyq kórermen jınady.
Kesh klassıkamen ashyldy. A.Adannyń «Korsar» baletinen úzindini ataqty ártister – Parıjde uzaq ýaqyt óner kórsetip, jýyrda ǵana oralǵan Ánel Rústemova, sondaı-aq Oljas Tarlanov pen trýppa solısi Dıas Qurmanǵazy oryndady. Jetekshi solıst Erkin Rahmatýllaev pen solıst Shuǵyla Ádephannyń ınterpretatsııasyndaǵy Rıkkardo Drıgonyń «Talısman» baletinen pa-de-de kórermenderdiń zor súıispenshiligine ıe boldy.
Ashyq aspan astyndaǵy teatr sahnasyna qazaqstandyq prıma Áıgerim Beketaeva bıdegi juby Oljas Tarlanovpen birge shyqqanda qoshemettiń qatty estilgeni sonsha, búkil Lıýblıana qol soqqandaı boldy. Oryndaýshylar Maks Rıhterdiń mýzykasyna Raımondo Rebektiń «Qazirgi sát qansha ýaqytqa sozylady?» spektaklinen dýet usyndy.
Rolan Petıdiń «Leda men Aqqý» nómirin oryndaǵan solıster Anastasııa Zaklınskaıa men Jánibek Ahmedıev te barlyǵyn tańǵaldyrdy. Osynaý biregeı nómir Eýropada sırek kórsetiledi, sondyqtan kópshilik ártisterdiń óner kórsetýin aıryqsha súısine otyryp baqylady. Solıster Shuǵyla Ádephan, Serik Naqyspekov, Arman Ýrazov, balet ártisi Sofııa Ádilhanova da joǵary kásibıligin pash etti. Olardyń Lıýblıanada óz jankúıerlerin tapqany sózsiz.
Keshtiń basty oqıǵasy Renat Gaısınniń mýzykasyna «Dala úni» nómiri men Patrık de Bananyń horeografııasynda «Turan» etno-folklorlyq ansambliniń mýzykasyna «Qıly zaman» ulttyq nómiriniń oryndalýy boldy. Oryndaýshylar Anastasııa Zaklınskaıa, Ǵalymjan Nurmuhamet, Bekzat Orynbaev pen Sultanbek Ǵumar jetkizgen ulttyq kolorıtti, qazaq halqynyń rýhyn slovenııalyqtar laıyqty baǵalap, solısterge dý qol shapalaq pen «Bárekeldi!» degen lebizderin jaýdyrdy.
«Men Lıýblıanada týyp-óstim ári ózimdi naǵyz asqaq óner jankúıerimin dep aıta alamyn. Sondyqtan ár jyldarda ótken Lıýblıana festıvali jadymda jaqsy saqtaýly. «Astana Opera» ártisteriniń óner kórsetýi men tamashalaǵan úzdik ári kásibı óner kórsetýlerdiń biri boldy.
Klassıkany, ulttyq nómirler men zamanaýı baletti bir gastroldik baǵdarlamaǵa úılesimdi syıǵyzý – asqan sheberlik. Osy oraıda balet trýppasynyń kórkemdik jetekshisi Altynaı Asylmuratovaǵa raqmetimdi aıtyp, qazaq baletiniń óskenine nazar aýdarǵym keledi. Trýppa erekshe, onyń óz máneri bar: erler quramy da, áıelder quramy da naǵyz kásibı deńgeıdi pash etti. Eger keleshekte Slovenııada nemese Qazaqstanda olardyń óner kórsetýin taǵy bir tamashalasam, óte qýanyshty bolar edim», – dep áserimen bólisti Agata Reznık esimdi kórermen.
