«Astana Opera» balet trýppasy Kremlde óner kórsetedi
«Vatslav Nıjınskıı. Orys baletiniń kemeńgeri» atty balet juldyzdarynyń ǵalamat gala-kontserti 18 sáýirde ótedi. Onyń aıasynda balet trýppasynyń kórkemdik jetekshisi, RF Halyq ártisi Altynaı Asylmuratovanyń jetekshiligimen «Astana Opera» teatry horeografııalyq ónerdiń jaýhar týyndysy - N.Rımskıı-Korsakovtyń mýzykasyna M.Fokınniń «Sheherazada» baletin usynady.
«Biz úshin barlyq gastrol mańyzdy, jaqynda balet trýppasy bir aı kóleminde Eýropa qalalarynda orasan zor jetistikpen óner kórsetti. Barlyq jerde anshlag boldy. Búginde Máskeýdegi eń bedeldi kontserttik zal sahnasynda «Sheherazada» bir bólimdi baletin oryndaý týraly Andrıs Lıepadan shaqyrtý kelip tústi. Bul biz úshin jaýapty ári aıtýly óner kórsetý bolmaq, sebebi gala-baǵdarlamanyń tutastaı bir bólimi «Astana Opera» teatryna berilgen. Kreml Saraıy sahnasyn kózdiń jaýyn alar dekoratsııalar sándeıtin bolady, biz olardy Qazaqstannan alyp baramyz. Ártisterimiz spektakldi keremet deńgeıde kórsetedi degen úmittemiz. Bizge degen yqylasy men senimi úshin Andrıs Marısovıchke alǵys bildiremin. Naýryz aıynda qazaqstandyq kórermender osynaý baletti «Astana Opera» sahnasynan tamashalaı alady, - dep atap ótti Altynaı Asylmuratova.
Dástúr boıynsha Reseıdiń Halyq ártisi Andrıs Lıepanyń «Qoltańbalar jáne bedel» jobasy jyl saıyn ótedi. Gala-kontsert baǵdarlamasyna «Qasıetti kóktem», «Petrýshka», «Uıqydaǵy arý», «Jızel», «Talısman» jáne t.b. baletterdiń úzindileri engen. Degenmen de, keshtiń basty oqıǵasy Lev Baksttyń qaıta jańǵyrtqan dekoratsııalary men kostıýmderi bar «Sheherazada» shyǵys ertegisiniń kórsetilimi bolmaq.
