«Astana Opera» ártisteri Sankt-Peterborda zor qoshemetke bólendi

Birneshe saǵattyq áýe jolymen 3 368 shaqyrymdyq qashyqtyqty artta qaldyrǵan ártister Peterborǵa toqtady. Qazaqstandyq bıshilerdi Fın shyǵanaǵynyń jaǵasynda ornalasqan qala ashyq aýa raıymen, sondaı-aq spektaklge qatysty jarqyn afıshalarymen qarsy aldy.

Reseıdiń mádenı astanasyna birneshe kún buryn jetkizilgen kostıýmder men dekoratsııalar Marıın teatrynyń artqy sahna keńistigine ornalastylyrǵan. Bul - sheberhanalar men repetıtsııalyq zaldarǵa jeke joldarmen qosylǵan ózindik tynysy bar jeke álem. Ártister Marıınskıı-2 sahnasyna tez beıimdildi, sebebi ol «Astana Opera» sahnasyna qatty uqsas.

Qoıylymnan bir kún buryn ártister men teatr basshylyǵy TASS aqparattyq agenttigi alańynda ótken baspasóz konferentsııasyna shaqyryldy. Aıta keterligi, búkil álem jýrnalısteri tikeleı translıatsııa arqyly oqıǵa ornyn baqylaý múmkindigine ıe boldy. Reseılik jáne qazaqstandyq buqaralyq aqparat quraldarynyń ókilderi «Astana Opera» teatrynyń gastroldik saparyna úlken qyzyǵýshylyq tanytty.

Baspasóz konferentsııasy barysynda Sankt-Peterbordyń syrtqy baılanystar boıynsha komıtetiniń TMD elderi jáne RF óńirleri basqarmasynyń basshysy Svetlana Jýrkına peterborlyqtardyń álemge áıgili teatrlardyń biri - «Astana Opera» balet trýppasyn qýana qarsy alatyndyǵyn atap ótti.

- Biz, qonaqtarymyz jumys jasaıtyn teatrdyń keremettiginen habardarmyz. Ártisterdiń Marıınskıı-2 sahnasynda sátti óner kórsetýine tilektespiz, - dedi S.Jýrkına.

Blogerler men jýrnalıster qoıylym aldyndaǵy daıyndyqqa da qatysty. Elena Tarasenkonyń áleýmettik jelidegi shaǵyn pikiri: «Dekoratsııalar sahnaǵa ornalastyrylyp, olardyń aýystyrylý tártibi tekserilýde. Kordebalettiń róli erekshe. Sekirý qımylyna ıkemdi myqty ártister kóp. Trýppanyń oryndaýshylyq tehnıkasy bıik deńgeıde. Jarqyn ári yqshamdalǵan kostıýmder Rolan Petıdiń sál epsiz plastıkasyna saı kelip tur. Solısteri de tamasha. Qoıylymnyń birinshi kúni sahnaǵa jas oryndaýshylar shyǵady. Erlerdiń sekirý qadamdary alshaq, bıdiń tehnıkasynda min joq. Kórermenniń bul qoıylymnan lázzat alatyndyǵy sózsiz».

Reseılik teatrdaǵy qazaqstandyq qoıylymǵa eki kún boıy adam lyq toldy. Bári de joǵary mádenıetpen kezdesý sátin asyǵa kútýde. Jańa teatrdyń ishki jabdyǵy ádemiligimen kóz tartady. Kórermen zalynyń syrtqy qabyrǵalary jarqyn onıks tasymen kómkerilgen. Zaldyń ózi joǵary talǵammen jasalyp, ashyq tústi aǵash jabdyqtar keńistikti arttyryp turǵandaı. Kórermender óz oryndaryna jaıǵasty.

«Astana Opera» balet trýppasynyń kórkemdik jetekshisi, Marıın teatrynyń burynǵy prımasy Altynaı Asylmuratova, peterborlyq teatrda Rolan Petıdiń «Parıj Qudaı anasynyń sobory» spektaklin qoıýdy usyna otyryp, tańdaý jasaýda qatelespegendigine senimdi boldy. Alaıda, ol mýzyka yrǵaǵyna dóp túsýdi talap etetin stıldi, ári jasampaz horeografııany oryndaý ońaıǵa soqpasyn da jaqsy túsindi. Óıtkeni, ózi de balerına retinde áıgili frantsýz baletmeısteriniń trýppasynda kúrdeli bas partııalardy bes jyl boıy somdaǵan.

Tańdaý durys jasalǵany haq: balet súıer qaýym men balet synshylaryn qosqanda barlyq kórermen rıza bolyp qana qoımaı, shattyqqa bólenip, uzaq ýaqyt ártisterdi sahnadan jibermesten tolassyz qoshemetke bóledi.

Qoıylymǵa Marıın teatrynyń Sımfonııalyq orkestri qatysty, dırıjeri - Arman Orazǵalıev. Morıs Jarrdyń kúrdeli mýzykasyn ádemi oryndaý tapsyrmasyn ártister de, dırıjer de joǵary deńgeıde júzege asyrdy. Spektakldiń bastalýyna deıin jalǵasqan uzaq daıyndyqtar nátıjesinde orkestrdiń de daýysy tamasha shyqty.

Birinshi kúni Kvazımodo partııasyn kóptegen halyqaralyq baıqaýlardyń Gran-prı ıegeri Baqtııar Adamjan oryndady, Esmeralda rólinde Qazaqstannyń eńbek sińirgen qaıratkeri Áıgerim Beketaeva jarqyrap shyqty, Feb - Oljas Tarlanov, Klod Frollo - halyqaralyq baıqaýlardyń laýreaty Ǵazız Rysqulov. 

Al, ekinshi kúni Qazaqstannyń eńbek sińirgen qaıratkeri Rústem Seıitbekov Kvazımodo partııasyn oryndasa, onyń súıiktisi - Esmeralda rólinde Qazaqstannyń eńbek sińirgen qaıratkeri Mádına Basbaeva boldy. Halyqaralyq baıqaýlardyń laýreaty Arman Orazov Feb beınesin asha bildi. Klod Frollo - halyqaralyq baıqaýlardyń laýreaty Serik Naqyspekov.

Qoıylymnan keıin balet sarapshylary spektaklden alǵan áserlerimen bólisti. KSRO Halyq ártisi, balet ustazy, burynǵy Kırov atyndaǵy Lenıngrad opera jáne balet teatrynyń (qazirgi Marıın teatry) solısti Olga Moıseeva bylaı dedi:

- Qoıylym óte keremet áser qaldyrdy. «Astana Opera» teatrynyń bizge kelgenine óte qýanyshtymyn, mundaı keremet oryndaýdaǵy qoıylymdy tamashalaýdan lázzat aldyq. Trýppanyń jaǵdaıy óte jaqsy, bıge jan-tánimen berilgen jalyndy jastar eken. Ártisteriniń bári jas, ózderiniń ne istep júrgenderin  túsinedi, kórermenge bárin egjeı-tegjeıli jetkize biledi, sol sebepti kórermen jaqsy qabyldady. Bul jerde Reseıdiń Halyq ártisi, «Astana Opera» baletiniń kórkemdik jetekshisi Altynaı Asylmuratovanyń eńbegi zor dep esepteımin. Bul spektakldi Marıın teatrynda maestro Rolan Petıdiń ózi qoıyp júrgen kezde men uzaq ýaqyt osynda jumys istedim, jáne sol kezdegi qoıylymmen salystyra alamyn. Qazaqstandyq trýppanyń oryndaýynda horeograftyń túpnusqasy kórsetilip, onyń alǵashqy oıy jetkizilgen. Bizdegi qoıylym qyzyqty da qysqa bolatyn, al bul joly Marıın teatrynda bolmaǵan toptyq kórinister kóp baıqaldy. Kvazımodo men Esmeralda partııalarynyń oryndaýshylary, sondaı-aq tamasha jas ártister peterborlyq kórermenniń júregin jaýlap aldy. Feb jáne Klod Frollo da - bári tamasha, bizge óte unady. Balettiń mýzykasy óte kúrdeli, biraq orkestr ony keremet oryndady, dırıjerdiń myqtylyǵyna da kóp nárse baılanysty, - dep aıaqtady Olga Moıseeva.

  Onyń áriptesi - synshy, ónertaný ǵylymdarynyń kandıdaty, A.ıA.Vaganova atyndaǵy orys balet akademııasynyń jáne N.A.Rımskıı-Korsakov atyndaǵy Sankt-Peterbor konservatorııasyndaǵy horeografııa kafedrasynyń dotsenti Olga Rozanova, bul HH ǵasyrdaǵy eń kúrdeli spektaklderdiń biri ekendigin atap ótti.

 - Tereń mazmuny da, horeografııasy da kúrdeli shyǵarma. Bul spektakl 50 jyl buryn qoıylǵan, alaıda áli kúnge deıin qazirgi zamannyń shyǵarmasyndaı mańyzdy. Óıtkeni, Rolan Petı frantsýz baletiniń klassıgi, kóptegen spektaklder qoıǵan ol erekshe oıdyń ıesi bolǵan. Múmkin bul shyǵarma onyń kóptegen muralarynyń ishindegi eń mańyzdysy, eń utqyr ári antıromantıkalyq shyǵarmasy shyǵar. Onyń zamanaýılyǵy osynda. Bizdiń ómirimiz náziktik pen qaıyrymdylyqtan tym alys jáne ol qorqynyshty álemdi kórsete bildi. Tek ekinshi bólimde ǵana biz qaıyrymdylyq pen mahabbattyń bul júreksizdikke sózsiz tosqaýyl bola alatyndyǵyn kóremiz. Bul jerde basty orynǵa kordebalet ıe. Meni olardyń oryndaýshylyq deńgeıi tańǵaldyrdy. Onda keremet solıster, talantty ártister baryn men buǵan deıin bilgenmin. Horeografııa tym kúrdeli. Kordebalet san qyrly, sahnanyń kóp bóligin sol alady. Eń bastysy, osyndaı qıyn qozǵalysta kóptiń birkelki jumys jasaýyn kórdim, bul jattyqtyrýshylardyń eńbekqorlyǵyn kórsetedi. Óıtkeni, bir kóriniste ártúrli kordebalettik qımyldardy utqyr ári ótkir, asqan talpynyspen oryndaý óte qıyn. Aıta ketetini, bir kordebalettiń ózi birneshe partııany oryndaıtyndyǵy. Marıın teatrynda birneshe top bolsa, munda barlyǵyn sol adamdar oryndaıdy. Ártisterdiń oryndaýshylyq sheberlikteriniń deńgeıi meni tańǵaldyrdy. Osy balette buryn bılegen Altynaı Asylmuratova men Konstantın Zaklınskıı (Feb) tamasha jumys atqarǵany kórindi. Ózine tán ereksheligi bar Elena Sherstnevanyń da trýppamen jumys jasaý qabileti joǵary. Bul spektakldi álemniń kez-kelgen sahnasynda uıalmaı kórsete berýge bolady, - dedi Olga Rozanova.

Mundaı mańyzdy sharadan qazaq dıasporasynyń ókilderi de qalys qalmady. Qazaqstanda týyp, qazirgi ýaqytta Peterbordyń turǵynyna aınalǵan qazaqtar qoıylymnyń ótetindigi jaıly jarnamany estı salysymen bılet satyp alǵandyqtaryn aıtady. Jergilikti peterborlyqtar da qoıylymnan alǵan áserlerimen bólisti. 

­-Men Sankt-Peterborda jumys isteımin, Astanadan jumys taýyp, kóship baryp teatrlaryńyzdyń barlyq repertýaryn kórýge daıynmyn. Bárin túbegeıli ózgertýge ázirmin. Bárinen buryn unaǵany - barlyq deńgeıdegi jumystyń joǵarylyǵy - bı de, kostıýmder de, barlyq obrazdardyń oryndy bolýy, mýzykasy, bári keremet, eshqandaı min tappaısyń deýge bolady, - deıdi ıAna Mamonova.   

Gastroldik sapardyń nátıjesin shyǵara kele, «Astana Opera» MOBT dırektory Ǵalym Ahmedıarov ártisterdiń eńbekterine alǵysyn bildirip, KSRO Halyq ártisi, M.I.Glınka atyndaǵy RKFSR memlekettik syılyǵynyń laýreaty, RF memlekettik syılyǵynyń laýreaty Oleg Vınogradovtyń bergen joǵary baǵasyn óz aýzynan estýi úlken qýanysh syılaǵandyǵyn aıtyp ótti.

- Oleg Mıhaılovıch kóp jyldar boıy Marıın teatrynyń balet trýppasyn basqardy, sol sebepti onyń «Astana Opera» teatrynyń peterborlyqtar úshin naǵyz merekelik qoıylym qoıǵandyǵyn, balet trýppasynyń deńgeıi joǵary ekendigin jáne kórermen bizdiń qoıylymdarymyzdy jıi kórgisi keletindigin bildirýi - biz úshin qýantarlyq, ári maqtanarlyq jáıt. Osynyń ózi úlken jetistik dep oılaımyn, - dedi Ǵalym Ahmedıarov.

Jyly qabyldaý, gúl shoqtary, mine osylaı taǵy bir jaýhar qoıylym «Astana Opera» balet trýppasy gastroldik saparlarynyń tizbegine endi. Ártisterdi aldaǵy ýaqytta kanshama sahnalar men jańalyq kútip turǵany belgisiz. Tek, qazaqstandyq teatrdyń sheteldik saparlarynyń kelesi tiziminde Kýveıt, Oman jáne Italııa elderi turǵandyǵy belgili. 

«Astana Opera» ujymynyń Marıın teatryndaǵy gastroldik sapary QR mádenıet jáne sport mınıstrliginiń jobasy ekendigin esterińizge salamyz. Gastroldik sapar «EKSPO-2017» baǵdarlamasynyń aıasynda ótip, barlyq shyǵyn demeýshilerdiń esebinen qarjylandyryldy.