«Astana Opera» alǵashqy «Jibek joly» halyqaralyq festıvalin ótkizedi

Astana turǵyndary men qonaqtary joǵary óner merekesin 17 qyrkúıek pen 5 qazan aralyǵynda tamashalaı alady, dep habarlaıdy «Astana Opera» teatrynyń baspasóz qyzmeti.

Festıval baǵdarlamasy boıynsha «Astana Opera» teatrynyń úzdik spektaklderi: «La Skala» teatrynyń túpnusqadaǵy qoıylymy - rejısser Lýka Ronkonıdiń nusqasyndaǵy «Toska» operasy kórermen nazaryna 17 qyrkúıekte usynylady. Qoıylymǵa qatysatyn ıtalıandyq juldyzdar quramy: Toska - Anna Pirozzi (Italııa), Kavaradossı - Massimo Giordano (Italııa), Skarpıa - Alberto Gazale (Italııa). S. Prokofevtiń «Romeo men Djýletta» baletin 19 qyrkúıekte kórýge bolady, Romeo róline Roman Mıhaılov (Frantsııa) shaqyrtylsa, Djýlettany Mádına Baspaeva (Qazaqstan) somdaıdy. M. Tólebaevtyń «Birjan-Sara» operasy Marıınskıı teatrynyń jetekshi solısi Ahmet Aǵadıdiń (Reseı) jáne Sara partııasyn tamasha oryndaıtyn Qazaqstan Respýblıkasynyń, Tatarstan Respýblıkasynyń Halyq ártisi, QR Memlekettik syılyǵynyń ıegeri Nurjamal Úsenbaevanyń (Qazaqstan) qatysýymen 20 qyrkúıekte qoıylady. A. Hachatýrıannyń sahnalyq qoıylymy - «Spartak» baletin kórermen 23 qyrkúıekte tamashalaı alady, Egına partııasyn Reseıdiń Úlken teatrynyń prıma balerınasy Ekaterına Shıpýlına (Reseı) somdaıdy. Álemdik mádenıettiń fenomeni - «Aqqýly kól» baletimen 27 qyrkúıekte tamsanýǵa bolady. Odetta partııasyn Halyqaralyq konkýrstardyń dıplomanty, «Astana Opera» baletiniń jetekshi solısi Áıgerim Beketaeva (Qazaqstan), Zıgfrıd partııasyn Marıınskıı teatry balettik trýppasynyń sańlaǵy, Vaganova-prix Halyqaralyq konkýrsynyń laýreaty Grıgorıı Popov (Reseı) oryndaıdy. «Astana Opera» juldyzdary qatysatyn gala-kontsert 29 qyrkúıekte ótedi.

Ataqty Abaı atyndaǵy MAOBT festıvalǵa P. Chaıkovskıı, A. Shnıtke jáne J. Bızeniń mýzykasyna jazylǵan B. Eıfmannyń «Qyzyl Jızel» baletin ákeledi. Jandy baýrap alatyn, horeografııasy erekshe mánerli zamanaýı baletti 21 qyrkúıekte kórýge bolady. Balettik spektakldiń qoıýshy sýretshisi - Martıns Vılkarsıs (Rıga qalasy), kostıým sýretshisi - Vıacheslav Okýnev, Reseıdiń halyq sýretshisi, Memlekettik syılyqtyń ıegeri (Sankt-Peterbor qalasy).

Ulttyq Qytaı teatry (QHR) 25 qyrkúıekte Qytaıdyń biregeı ulttyq mádenıetin, atap aıtqanda onyń opera jáne balet ónerin, sondaı-aq qyzyqtyratyn halyq ánderi men bı qoıylymdarynan turatyn kontsert usynady.

27 qyrkúıekte Aterballeto (Italııa), Abaı at. MAOBT (Qazaqstan), Marıınskıı teatrlarynyń (Reseı) qatysýymen búgingi balet óneriniń jaǵdaıyn qozǵaıtyn konferentsııa ótedi.

Bıbigúl Tólegenovanyń «Súıý, úmittený jáne sený» atty 30 qyrkúıekte boatyn benıfısi KSRO halyq ártisiniń 85 jyldyq mereıtoıyna arnalady. Kontsert baǵdarlamasynda Qazaqstan jáne shetel kompozıtorlarynyń operasynan arııalar, halyq ánderi, romanstar, aspapqa arnap jazylǵan týyndylar bar. Keshte Qazaqstannyń belgili opera ánshileri, Bıbigúl Tólegenova atyndaǵy konkýrstyń laýreattary, onyń shákirtteri men dástúrin jalǵastyrýshylar óner kórsetedi. Kontsert «Astana Opera» horynyń jáne sımfonııalyq orkestriniń qatysýymen ótedi.

Ortalyq Azııada alǵashqy ret aty ańyzǵa aınalǵan Marıınskıı teatrynyń jaýap retindegi gastroli ótip, reseılik teatr R. Vagnerdiń «Nıbelýng saqınasy» tetralogııasynyń eki bóligin: 3 qazanda «Reın altyny» operasyn oryndasa, 4 qazanda Marıınskıı trýppasy saparyn «Valkırııa» operasymen aıaqtaıdy. Atalǵan operalardyń Qazaqstanda buǵan deıin oryndalmaǵanyn atap ótken jón.

«Jibek Joly» festıvali baǵdarlamasyn 5 qazan kúni «Astana Balet» ujymy jabady.