«Astana Opera» Alan Bóribaevtiń jańa jobasyn usynady
NUR-SULTAN. QazAqparat - «Astana Opera» teatrynyń bas dırıjeri, Qazaqstannyń eńbek sińirgen qaıratkeri, Memlekettik syılyqtyń laýreaty, áıgili maestro Alan Bóribaev elorda turǵyndary men qonaqtarynyń nazaryna ázil aralas eksklıýzıvti baǵdarlama - «Moler, Volter jáne Bomarshe, nemese Frantsýz komedııasynyń negizin salýshylar» atty operalyq-sımfonııalyq kontsert usynady, dep habarlaıdy QazAqparat.
Kontsert 17 jáne 18 qazan kúnderi ótedi.
Qazaqstanda jáne shet memleketterde Alan Bóribaevti eń bıik deńgeıdegi maestro retinde tanıdy. Onyń dırıjerligimen túrli elderdiń sımfonııalyq orkestrleri oınaıdy. Budan bólek, onyń daryndylyǵynyń taǵy bir qyry – álemdik mýzykalyq qaýymdastyq arasynda rezonans týdyratyn jobalardy shyǵarýy. Olardyń ishinde Qazaqstan, Italııa jáne basqa elderden kelgen myńnan astam mýzykanttyń oryndaýyndaǵy Gýstav Malerdiń №8 sımfonııasy, Karl Djenkınstiń SHINE ASTANA saltanatty odasy bar. Jyldyń basynda qoıylǵan «Italııadan kelgen hattar» operalyq-sımfonııalyq kontserti tyńdarmandardyń ystyq yqylasyna bólenip, júrekterinen oryn aldy. Asqaq ónerdiń jankúıerleri maestrodan shyǵarmashylyq tartýlardyń jalǵasyn asyǵa kútti.
A.Bóribaev usynyp otyrǵan «Moler, Volter jáne Bomarshe, nemese Frantsýz komedııasynyń negizin salýshylar» atty baǵdarlamanyń ózgesheligi – kontsertte Jan-Batıst Molerdiń «Meşanın vo dvorıanstve» komedııasynyń erkin oqylýynda, maestronyń ózi jasaǵan monolog nusqasy Rıhard Shtraýstyń osy komedııaǵa arnap jazǵan mýzykasynan sıýıtamen birge shyrqalady. Ár jyldary atalǵan pesadaǵy mýzykalyq jáne dramalyq bastaýlardy úılestirý tujyrymdamasyn maestro A.Bóribaev Baltımor (AQSh), Dýblın (Irlandııa), Maınıngende (Germanııa) usynyp, ónersúıer qaýymnyń zor qyzyǵýshylyǵyn týdyrǵan bolatyn.
Mýzykalyq monologtyń negizgi qaharmany Molerdiń keıipkeri Jýrden myrza ekenin atap ótken jón, Alan Bóribaev ony kúlkili, súıkimdi, sóıte tura ańqyldaq ári pań minezdi adam retinde kórgen. Bas keıipkerdiń tula boıy balalyq bilimqumarlyq pen balaǵa tán ǵashyq bolǵyshtyq qasıetterge toly. Maestro Jýrdenniń zııaly ortalarda tanylýǵa degen toqtamsyz qumarlyǵyn kórsetýdegi Molerdiń qoltańbasyn saqtap qalǵan. Barlyq oqıǵa osynyń aınalasynda órbıdi. Jýrden myrzany orkestr mýzykanty Áset Neldibaev somdaıdy.
Mýzykalyq keshti frantsýz komedııasynyń altyn ǵasyrynyń klassıkteri Moler, Volter jáne Bomarsheniń mátinderine jazylǵan shyǵarmalar usynylatyn mazmundy baǵdarlama jalǵastyrady.
Sonymen qatar talǵampaz jurtshylyq nazaryna Volter men L.Bernstaın, P.Bomarshe men V.Motsart, Moler men R.Shtraýstyń ómiri men shyǵarmashylyǵy týraly ocherkter usynylady. Ádebı arqaý kontserttiń mýzykalyq mazmunyn ásemdikpen kómkeredi.
«Astana Opera» sahnasynda alǵash ret kontserttik baǵdarlama aıasynda V.Motsarttyń «Fıgaronyń úılený toıy» operasynan ekinshi bólimniń fınaly oryndalatynyn atap ótý kerek.
Keshke Qazaqstannyń eńbek sińirgen qaıratkerleri Talǵat Musabaev, Aıgúl Nııazova, Bashqurtstan Respýblıkasynyń eńbek sińirgen ártisi Alfııa Karımova, «Qurmet» ordeniniń kavaleri Aızada Qaponova, halyqaralyq baıqaýlardyń laýreattary Talǵat Ǵaleev, Evgenıı Chaınıkov, Gúljanat Sapaqova, Erjan Saıypov, Shyńǵys Rasylhan, Erulan Kámel jáne taǵy basqalary qatysady.
Kontserttiń rejısseri – Erenbaq Toıkenov.
