Astana Open: Kýkýshkın jartylaı fınalǵa óte almady
NUR-SULTAN. QazAqparat – Qazaqstandyq Mıhaıl Kýkýshkın Astana Open ATP 250 týrnıriniń jartylaı fınalyna óte almady, dep habarlaıdy QazAqparat tilshisi.
Álemniń 91-raketkasy M.Kýkýshkın shırek fınalda reıtıngte 98-orynda turǵan 21 jastaǵy fınlıandııalyq Emıl Rýýsývýorımen sheberlik baıqasty.
Birinshi partııada bastap dop bergen fın sportshysy esep 3:2 bolǵan mezette breık jasap ketti. Sodan keıin osy basymdylyǵynan aıyrylǵan joq – 6:3.
Ekinshi setti E.Rýýsývýorı qos breıkpen bastady – 4:0. Sosyn matchty taǵy bir breıkpen támamdady – 6:1.
Báseke 1 saǵat 20 mınýtqa sozyldy.
Fın tennısshisi fınalǵa shyǵý úshin álemniń 39-raketkasy, frantsııalyq Adrıan Mannarınomen talasady. Ol shırek fınalda amerıkalyq Makkenzı Makdonaldty 6:1, 6:4 esebimen tize búktirdi.
Ekinshi jartylaı fınalda amerıkalyq Frensıs Tıafo men aýstralııalyq Djon Mıllman kezdesedi.
Elimizde ATP 250 deńgeıinde alǵash ótip jatqan jarys 1 qarasha kúni márege jetedi.
Eske sala keteıik, budan buryn Mıhaıl Kýkýshkınniń Astana Open týrnıriniń birinshi raketkasyn utqanyn, karantınge baılanysty Parıjdegi masters jarysynyń kórermensiz ótetinin jazǵan bolatynbyz.
