Astana Open: Evseev irikteý saıystarynan óte almady
NUR-SULTAN. QazAqparat – Qazaqstandyq Denıs Evseev Astana Open ATP 250 týrnıriniń irikteý saıystarynan óte almady, dep habarlaıdy QazAqparat tilshisi.
Reıtıngte 372-orynda turǵan D.Evseev álemniń 117-raketkasy, aýstralııalyq Mark Polmanspen sheberlik baıqasty.
Birinshi partııada M.Polmans 4:2 esebimen alǵa ketti. Budan keıin D.Evseev qatarynan úsh geımdi aldy – 5:4. Biraq setke dop bergende, óz múmkindigin paıdalana almady. Degenmen taǵy bir breık jasap, partııany óz esebine jazdy – 7:5.
Ekinshi set aýstralııalyq tennısshiniń basymdylyǵymen ótti – 6:3. Úshinshi, sheshýshi partııada ol qarsylasyna esh múmkindik bergen joq – 6:0.
Báseke 1 saǵat 43 mınýtqa sozyldy.
M.Polmans álemniń 101-raketkasy, japonııalyq ıÝıtı Sýgıta nemese reıtıngte 149-orynda turǵan mysyrlyq Mohamed Safvattyń bireýimen negizgi týrnırge beriletin joldama úshin talasady.
Osylaısha irikteý saıystary qazaqstandyqtar úshin sátsiz aıaqtaldy. Endi bar úmit negizgi týrnırde óner kórsetetin Aleksandr Býblık, Mıhaıl Kýkýshkın, Dmıtrıı Popko jáne 19 jastaǵy Tımofeı Skatovta.
Eske sala keteıik, budan buryn qazaqstandyq tennısshilerdiń Astana Open týrnırindegi qarsylastary belgili bolǵanyn, A.Nedovesovtiń jeńilip qalǵanyn jazǵan edik.
