Astana Open ATR 500 týrnırinde óner kórsetkim keledi – Beıbit Jýkaev
ASTANA. QazAqparat – Astana Open ATR 500 týrnırinde óner kórsetkim keledi. Bul týraly qazaqstandyq tennısshi Beıbit Jýkaev málim etti, dep habarlaıdy QazAqparat tilshisi.
Onyń aıtýynsha, qazirgi kezde elordadaǵy «Dáýlet» tennıs ortalyǵynda ótip jatqan el chempıonatynda úzdik shyqsa, Astana jarysynyń irikteý saıystaryna joldama alady.
«Birinshilik men úshin sátti ótýde. Alǵashqy eki oıynǵa onsha kúsh jumsaǵan joqpyn. Endi shırek fınalda utsam, ar jaǵynda eki-aq kezdesý qalady. Qazaqstan chempıonyna altyn medalǵa qosa aqshalaı syıaqy, sondaı-aq elimizde alǵash ret ótkeli otyrǵan Astana Open ATR 500 dodasynyń irikteý saıystaryna joldama beriledi. Árıne, mundaı joǵary deńgeıdegi tennıs toıynyń ótýi – úlken mártebe. Jankúıerler, ásirese, balalar Novak Djokovıch, Karlos Alkaras, Danııl Medvedev, Stefanos Tsıtsıpas, Andreı Rýblev, ıAnnık Sınner syndy ataqty oıynshylardyń ónerin jaqynnan tamashalaıdy. Men buryn ATR 500 nemese 250 jarystaryna qatysyp kórmegen edim. Sondyqtan budan tys qalmaýǵa bar kúshimdi salamyn», - dedi 21 jastaǵy B.Jýkaev.
Aqtaý tennıs mektebiniń túlegi chellendjer týrnırlerinde bıyl tym-táýir nátıje kórsetip júr. Ystambulda shırek fınalǵa deıin jetse, elordada Presidents Cup jáne Taılandta jartylaı fınalda oınady. 2021 jyldy álemdik reıtıngte 717-orynmen aıaqtasa, qazirgi kezde 326-satyda tur.
Eske sala keteıik, budan buryn qazaqstandyq tennısshiniń Lıssabon týrnırin jeńispen bastaǵanyn jazǵan bolatynbyz.
Sondaı-aq qazaqstandyq tennısshiler Bolgarııadaǵy jarystyń shırek fınalyna shyqty .
Qazaqstandyq tennısshi Italııadaǵy týrnırdiń shırek fınalyna ótti.
Foto: ktf.kz
