Astana óńirlik volonterlik habqa aınalýdy kózdeıdi
ASTANA. KAZINFORM – Osy baǵytta elordada volonterlik ınfraqurylym keńeıtilip, halyqaralyq áriptestik nyǵaıtylyp jatyr. Bul týraly Astana qalasy Kommýnıkatsııalar qyzmetinde ótken baspasóz májilisinde qala ákimdiginiń «Astana jastary» KMM basshysy Shyńǵys Tóleýlın aıtty.
Onyń aıtýynsha, volonterlik qozǵalysty damytý maqsatynda Ulttyq volonterler front-ofısine, Halyqaralyq volonterlik ortalyqqa jáne segiz volonterlik uıymǵa arnaıy ǵımarattar berilgen.
– Qazir Halyqaralyq volonterlik ortalyq Ortalyq Azııa elderimen, Ázerbaıjan jáne Túrkııamen yntymaqtastyq ornatyp otyr. Aldaǵy ýaqytta ony óńirlik volonterlik habqa aınaldyrýdy josparlap otyrmyz, - dedi spıker.
Shyńǵys Tileýlınniń aıtýynsha, búginde Astanada 50-ge jýyq volonterlik uıym men qozǵalys jumys isteıdi. Olardyń qatarynda áleýmettik turǵydan osal otbasylarǵa qoldaý kórsetetin «Astana klýb dobrıakov» jáne habar-osharsyz ketken adamdardy izdeýge atsalysatyn «LIDER.KZ Astana volonterlary» uıymdary bar.
– Qazir eriktilerdi mańyzdy memlekettik jáne halyqaralyq is-sharalarda, áleýmettik mekemelerde, qaıyrymdylyq aktsııalary men qoǵamdyq bastamalar kezinde jıi kórýge bolady. Eriktilik búginde tek stýdent jastardyń isi emes. Bul iske mektep oqýshylary, kásiporyn qyzmetkerleri jáne túrli sala mamandary belsendi qatysyp keledi, – dedi ol.
Aıta keteıik, elimizde volonterlikti qoldaýdyń jańa tujyrymdamasy ázirlenip jatyr.
Qujat eriktilik qozǵalysyn odan ári damytýdyń negizgi baǵyttaryn aıqyndap, salalyq volonterlikti kúsheıtýdi kózdeıdi.
