«Astana» óńirlik qolbasshylyǵyndaǵy serjanttardy daıarlaý kýrstary - armııany kásibılendirýdegi taǵy bir qadam

ASTANA. QazAqparat «Astana» óńirlik qolbasshylyǵyna qarasty 31775 áskerı bóliminde serjanttar quramyn daıarlaýdyń úsh aptalyq kýrsy bastaldy. Taktıka jáne oqý-jaýyngerlik oq atýlar, dene jáne saptyq daǵdy, topografııa, ınjenerlik jáne tehnıkalyq daıarlyq ispetti áskerı istiń negizgi pánderi boıynsha qysqy polıgon jaǵdaıynda teorııa jáne is júzinde oqyp-úırenýshiler bilimderin pysyqtaýy tıis.

QR QM baspasóz qyzmetiniń habarlaýynsha, oqytý úderisinde jáne kýrs aıaqtalǵannan keıin emtıhan kezinde serjanttar pánder boıynsha mashyqtaryn rastap qana qoımaı, daıyndyqtyń anaǵurlym joǵary deńgeıine shyǵýy qajet. Joǵary upaı jınaǵan eń kásibı áskerı qyzmetshiler sertıfıkatqa ıe bolady.

«Astana» óńirlik qolbasshylyǵynan málim etkendeı, serjanttar úshin sertıfıkat alý daıyndyqtyń mańyzdy elementi bolyp tabylady. Kýrsta árbir áskerı qyzmetshi bilimi men daǵdysyn arttyrady, óziniń teorııalyq jáne praktıkalyq daıyndyǵyndaǵy «osal tustaryn» jetildiredi. Kásibı turǵyda ósýmen qatar daryndy, úlgili áskerı qyzmetshilerge mansaptyq satyda joǵarylaý úshin jańa múmkindikter ashylady. Bul áskerı mansapty jalǵastyrý jáne áskerlerdiń jalpy jaýyngerlik qabilettiligin nyǵaıtý úshin asa mańyzdy.

Atalǵan kýrs jylyna bir ret ótkiziledi. Bul Qarýly Kúshterdiń jańǵyrýy men ári qaraı tolyqqandy damýyna dáneker bolatyn serjanttar quramynyń deńgeıin sapaly arttyrý jáne armııanyń qýatty kásibı negizin qurýda basty tásilderdiń biri bolyp tabylady.