«Astana» «Oqjetpesti» tize búktirip, chempıondyqqa jaqyndaı tústi
ASTANA. QazAqparat - Qazaqstan Premer-lıgasynyń 24-týry aıasyndaǵy «Astana» - «Oqjetpes» oıynynda elordalyq ujym óz alańynda 4:0 esebimen jeńiske jetti.
«Astananyń» eýrokýboktarǵa qatysýyna baılanysty 24-týrdyń keıinge qaldyrylǵan kezdesýi alań ıeleriniń tolyq ústemdigimen ótti. Muny 10-mınýtta belarýstik jartylaı qorǵaýshy Ivan Maevskııdiń esep ashyp, 20-mınýtta Kabananganyń esepti eselegeninen-aq ańǵarýǵa bolady. Ekinshi taımda Patrık Tvýması úshinshi goldyń avtory atansa, qosalqy quramnan alańǵa shyqqan Marın Tomasov qonaqtar qaqpashysy M. Golýbnıchııdi tórtinshi ret óz qaqpasynan dop alyp shyǵýyna májbúrledi. Bul R. Abdýllınniń esebine avtogol retinde jazyldy.
Kóptegen jankúıerler maýsym sońyna qaraı aýtsaıderler qaýipti bola bastaıtynyna ıek artyp, búgin «Astana» aıtýly qarsylyqqa dýshar bolady degen oıda bolǵany da shyndyq. Óıtkeni týrnır kestesiniń sońǵy ornyn ıelenip turǵan kókshetaýlyq ujym búgin qalaı da úsh upaı alýy tıis edi.
Endi 31 týrdyń qorytyndysy boıynsha, «Oqjetpes» 24 upaımen sońǵy orynda qaldy. Onyń aldyndaǵy 26 upaı jınaǵan «Tarazdyń» da kelesi jyly el birinshiligine qatysýy neǵaıbyl. Óıtkeni pleı-offqa qatysý múmkindigin beretin jalǵyz oryndy ıelenip turǵan «Aqjaıyqtyń» qorjynynda - 29, toǵyzynshy jáne segizinshi oryndardaǵy «Aqtóbe» men «Atyraýdyń» enshisinde 30 jáne 32 upaı bar.
Bıylǵy chempıonattyń taǵdyry 28 qazanda jáne 5 qarashada ótetin sońǵy eki týrda sheshiledi.
