Astana oqýshylar komandasy 10 jyl qatarynan respýblıkalyq olımpıadalarda birinshi oryn alyp keledi - Isekeshev
ASTANA. QazAqparat - Astana oqýshylar komandasy 10 jyl qatarynan respýblıkalyq olımpıadalarda birinshi oryn alyp keledi. Bul týraly daryndy balalarmen kezdesý barysynda Astana ákimi Áset Isekeshov habarlady.
«Astana mektepterine 129 myń bala bilim alýda, ótken jyly 117 myń bolǵan. Elordada 67 myń oqýshy túrli sharalarǵa qatysady, atap aıtsaq, túrli deńgeıdegi ǵylymı, sport, zııatkerlik olımpıadalar men baıqaýlar. Bul qýantarlyq jaǵdaı, óıtkeni balalardyń teń jartysyna jýyǵy ózin-ózi jetildirip, ózimen-ózi jumys jasaıdy degen sóz. Astana qalasy oqýshylar komandasy 10 jyl qatarynan respýblıkalyq olımpıadalarda birinshi oryndy jáne úzdik komanda ataǵyn bermeı keledi. Bul - óte jaqsy kórsetkish», - dedi Á. Isekeshov.
Onyń aıtýynsha, 2016 jyly elordada 324 oqýshy halyqaralyq olımpıada men baıqaýlarǵa, ǵylymı jobalarǵa qatysyp, 267 medalmen marapattaldy. Bul - 2015 jylmen salystyrǵanda, jaqsy nátıje. ıAǵnı, bilim berý sapasynyń jaqsy ekenin kórsetedi. Oqý úderisterine ınnovatsııalyq tehnologııalar engizildi. 42 kabınet robotty tehnıkamen jabdyqtaldy.
Ákim 2015 jyly №№ 3 jáne 15 mektepterde «smart-mektep» jobasy iske asyrylǵanyn atap ótti. 2017 jyly «elektrondyq kúndelik» jobasy iske asyrylady. Ol mektep oqýshylaryn aýyr sómke kóterýden aryltyp, ata-analardyń oqý úderisine qatysýyna múmkindik beredi.
Á. Isekeshov sońǵy 25 jylda bilim berý sapasyn jaqsartý úshin kóp nárse jasalǵanyn atap ótti. Búgingi jastarda shetelde, zııatkerlik mektepterde bilim alýǵa, ǵylymmen aınalysýǵa barlyq múmkindikter bar. Sondyqtan, jańa urpaq barynsha bilimdi, olarǵa kóp úmit artýǵa bolady.
