Astana — Nıý-Iork: tikeleı reıs kelesi jyly ashylýy múmkin
ASTANA. KAZINFORM — Kelesi jyly Astanadan Nıý-Iorkke tikeleı reıs ashylýy múmkin. Qazir elimiz AQSh-qa ushýǵa qajetti ruqsat alýǵa daıyndalyp jatyr.
Bul týraly IKAO-nyń avıatsııalyq qaýipsizdik aptalyǵynda Kólik vıtse-mınıstri Talǵat Lastaev aıtty.
Onyń sózinshe, birneshe apta buryn Qazaqstanǵa AQSh Federaldyq avıatsııa ákimshiliginiń 7–8 ınspektory kelgen. Olar bir apta boıy elimizdiń azamattyq avıatsııa júıesin tekserdi. Qorytyndy brıfıngte Qazaqstannyń avıatsııa salasyna jáne onyń halyqaralyq standarttarǵa sáıkestigine joǵary baǵa berilgen.
AQSh tarapynyń resmı esebi qarasha aıynda daıyn bolady. Al elimiz jyl sońyna deıin reıs ashýǵa ruqsat alýdy kózdep otyr.
— Jeltoqsan aıynda osyndaı uzaq baǵytqa ushýǵa múmkindik beretin Boeing Dreamliner ushaǵy jetkiziledi dep kútilýde. Ony paıdalanýǵa berý úshin ekıpaj ben tehnıkalyq mamandar tıisti daıyndyqtan ótip, qajetti ushý saǵattaryn jınaýy kerek. Barlyq talap oryndalsa, kelesi jyly tikeleı reıs ashýdy josparlap otyrmyz, — dedi Talǵat Lastaev.
Alǵashqy baǵyt retinde Nıý-Iork qalasy qarastyrylǵan. Al tikeleı reıs Astanadan ushady.
— Reıs uzaq baǵytqa qatynaıdy. Degenmen, eki el arasyndaǵy qarym-qatynas damyp keledi. Qazaqstanǵa degen qyzyǵýshylyq pen ınvestıtsııalyq-ekonomıkalyq baılanys ta artyp otyr, — dedi ol.
Ázirge bılet baǵasy eseptelgen joq. Jańa reıstiń tıimdiligi jolaýshylar suranysyna da baılanysty bolady.
Aıta keteıik, jaqynda Almatydan Vetnam men Chehııany baılanystyratyn reıs iske qosyldy.
