Astana neırohırýrgteri bas mıyna óte kúrdeli operatsııa jasady
ASTANA. QazAqparat - Ulttyq neırohırýrgııa ortalyǵynyń otashylary mı tamyrlary anevrızminiń (qan tamyrlarynyń keńeıýi) kóptegen belgileri bar Semeıdiń 47 jasar turǵynyna sátti operatsııa jasady, dep habarlaıdy QazAqparat.
Baspasóz qyzmetiniń málimetine qaraǵanda, azamatsha Semeı qalasynan elordadaǵy neırohırýrgııa ortalyǵyna sanıtarlyq avıatsııa arqyly jetkizildi. Klınıkaǵa jetkizilgen naýqas basynyń qatty aýyratyndyǵyn, sol jaq kózin asha almaıtyndyǵyn aıtqan.
2017 jyldyń 19 naýryzynda ol Semeıdegi qalalyq aýrýhananyń ınsýlttik bólimine jetkizilgen eken. Onda naýqas barlyq qajetti tekserýlerden ótkizildi. Zertteý nátıjesi boıynsha bas mıy tamyrlarynyń kóptegen anevrızmi belgileri anyqtaldy. Dárigerlerdiń sózine qaraǵanda, bundaı jaǵdaı adamdarda sırek kezdesedi. Al osy tekserýde anevrızmniń bireýi óte úlken kólemde ekendigi anyqtaldy. Sondyqtan da ol shuǵyl túrde Astanaǵa sanıtarlyq avıatsııa arqyly jetkizildi.
Óz kezeginde neırohırýrgter naýqastyń basyna óte kúrdeli operatsııa jasady. Búginde atalǵan azamatsha Semeıdegi úıine aman-esen jetkizildi.
Jyl saıyn Ulttyq neırohırýrgııa ortalyǵynda bas mıynyń tamyrlary patologııasy kezinde 400-ge jýyq operatsııa jasalady, onyń 70 paıyzy endovaskýlıarlyq ádispen (tamyr ishinde jasalatyn operatsııa) ótkiziledi. Búginde anevrızmge der kezinde operatsııa jasalsa, óte aýyr jaǵdaıdaǵy naýqastardyń emdelip ketýine tolyq múmkindik bar.
