«Astana» - «MıÝ» matchynyń bıletine 300 myń ótinim túsken
NUR-SULTAN. QazAqparat – «Astana Arenada» 28 qarasha kúni bolatyn «Astana» - «Manchester ıÝnaıted» oıynyna fýtbolsúıer qaýym zor qyzyǵýshylyq tanytyp otyr, dep habarlaıdy QazAqparat Sports.kz-ke silteme jasap.
Brıtanııanyń Daily Star tabloıdynyń habarlaýynsha, «Astana» pleı-ofqa shyǵý múmkindiginen aırylǵan bolsa da, tarıhı matchty kórgisi keletin jankúıerlerdiń sany azaımaǵan. Elordalyq klýb qyzmetkerleriniń málimdeýinshe, «Astana Arenaǵa» 30 254 kórermen syıady, al oıynnyń bıletine 300 myńnan astam ótinim kelip túsken.
«Buryn-sońdy bulaı bolǵan emes. «Manchester ıÝnaıted» — álemdegi eń tanymal klýbtardyń biri. Olardyń kelýi «Astana» úshin merekemen birdeı. Nur-Sultanda buǵan deıin de atyshýly oıyndar boldy, biraq dál mynadaı aýqymy keń match ótpegen. Stadıondaǵy oryndardan on ese kóp ótinim keldi», - dedi klýb qyzmetkeri Daily Star-ǵa bergen suhbatynda.
Aıta ketsek, KazFootball.kz saıtynyń «Manchester Evening News» basylymyna silteme jasap habarlaýynsha, manchesterlikterdiń quramynda debıýt oıynyn ótkizýi múmkin 10 jas fýtbolshy bar. Olar: Dılan Levıtt, Lardjı Ramazanı, Itan Leırd, Teden Mengı, Dıshon Bernard, Itan Galbreıt, Arnaý Pýıgmal, Mateı Kovar jáne D’Manı Býgeıl-Mellor. Sondaı-aq bıyl obyr aýrýyn jeńgen 19 jastaǵy Maks Teılor da bar.
«Manchester ıÝnaıted» Qazaqstanǵa myna qurammen keldi:
Qaqpashylar: Lı Grant, Mateı Kovar;
Qorǵaýshylar: Lıýk Shoý, Maks Teılor, Aksel Týanzebe, Teden Mengı, Dıshon Bernard, Itan Leırd;
Jartylaı qorǵaýshylar: Djessı Lıngard, Dılan Levıtt, Itan Galbreıt, Arnaý Pýıgmal, Djeıms Garner, Tahıt Chong, Eındjel Gomes;
Shabýylshylar: Meıson Grınvýd, Lardjı Ramazanı, D’Manı Býgeıl-Mellor.
Foto: www.fcastana.kz
