Astana múgedekter úshin qolaısyz qalalardyń reıtıngine endi
ASTANA. QazAqparat - Elorda áleýmettik jáne kólik ınfraqurylymy nysandaryn múmkindigi shekteýli jandarǵa beıimdeý boıynsha tıisti jospardy júzege asyra almaǵan qalalardyń qataryna endi.
Bul týraly búgin baspasóz máslıhatynda QR Eńbek jáne halyqty áleýmettik qorǵaý vıtse-mınıstri Svetlana Jaqypova málim etti, dep habarlaıdy QazAqparat.
«2016 jyly beıimdeýge qajet nysandardyń jalpy qatarynan 4 myń 640 nysandy múgedekterdiń muqtajdyǵyna laıyqtaý josparlanǵan bolatyn. ıAǵnı, óńirlermen tıisti jospardy qurdyq. 2017 jyldyń 1 qańtaryndaǵy jaǵdaı boıynsha 4 myń 537 nysan (97,8%) qajet dárejege keltirilgen»,-dedi S. Jaqypova.
Aıta keteıik, múgedekterdiń áleýmettik jáne kólik ınfraqurylymy nysandaryna kedergisiz ótýin qamtamasyz etý aıasynda 2012 jyldan bastap jyl saıyn olardy beıimdeýdiń óńirlik josparlary jasalýda. Qazaqstanda múmkindigi shekteýli jandar jıi baratyn 36 myń 200 nysan bar. Jergilikti atqarýshy organdar múmkindigi shekteýli jandarǵa qoljetimdiligi jóninde 28 myń 205 nysandy tólqujattandyrýdan ótkizýdi kózdegen edi. Ótken jyldyń qorytyndysynda 27 myń 828 nysan (98,7%) tólqujat alsa, onyń 17 myń 506 nysany (62,9%) beıimdelýge tıis boldy. Bulardyń 11 myń 212 nysany (64%) qajet deńgeıde ıkemdeldi. Múgedekterge qoljetimdilik qamtamasyz etilgen áleýmettik jáne kólik ınfraqurylymy nysandarynyń úlesi tólqujatqa ıe bolǵan jalpy nysandar qatarynan 77,4 paıyzdy qurady.
Belgili bolǵandaı, múmkindigi shekteýli azamattar jıi baratyn nysandardyń arasynda 100 paıyz tólqujattandyrý jumystary Aqmola, Almaty, Qostanaı, Qyzylorda jáne Ońtústik Qazaqstan oblystarynda eńserilgen. Tólqujattandyrýdyń tómen qarqyny Mańǵystaý oblysynda (1 myń 590 nysannan 390), Jambyl oblysynda (3 myń 36 nysannan 904), Astana qalasynda (1 myń 106 nysannan 401), Shyǵys Qazaqstan oblysynda (3 myń 907 nysannan 1 myń 926) baıqalǵan.
Beıimdeýge jatatyn nysandardyń jalpy kóleminen 90 paıyzdan astamy Aqmola, Almaty, Shyǵys Qazaqstan jáne Pavlodar oblystarynda qolaıly qalypqa keltirilgen. Sondaı-aq beıimdeýdiń tómen deńgeıi Mańǵystaý oblysynda (347 nysannan 97), Qaraǵandy oblysynda (785 nysannan 302), Batys Qazaqstan oblysynda (955 nysannan 467), Soltústik Qazaqstan oblysynda (1735 nysannan 876), Aqtóbe oblysynda (702 nysannan 295), Qostanaı oblysynda (1 myń 166 nysannan 593), Jambyl oblysynda (904 nysannan 598), Astana qalasynda (309 nysannan 132) nazarǵa ilikken.
Onyń sózine qaraǵanda, Astanada múmkindigi shekteýli adamdardyń barlyq sanattary úshin tolyq 100 paıyzǵa jabdyqtalǵan birde-bir nysan joq. 2016 jyly elordada qoljetimdilikti qamtamasyz etý maqsaty boıynsha tek 132 nysan ǵana qamtyldy
«Máselen, bir nysanda pandýs, dybys qurylǵylary qoıylsa, osynda ózge toptar úshin, ıaǵnı múgedekterdiń ózge sanattaryna tıisti jaǵdaı jasalmaǵan. Bul Astana úshin kórsetkish emes jáne osy máselede qalanyń múmkindigi de joq dep aıta almaımyz»,-dedi vıtse-mınıstr.
Osy oraıda ol nysandardaǵy beıimdeý jumystaryna tek ákimdik qana emes, sonymen qatar kásipkerler, dárihanalar men saýda oryndarynyń ıeleri jaýapty ekenin jetkizdi.
