«Astana Motorsports» komandasy «Dakar-2015» jarysyndaǵy eń qyzyqty kezeńder týraly aıtty
ASTANA. QazAqparat - Búgin ótken baspasóz máslıhatynda «Astana Motorsports» komandasynyń músheleri jer sharyndaǵy eń bedeldi ári qaýipti rallı-marafon «Dakar-2015» jarysyndaǵy eń qyzyqty sátterimen bólisti.
Komanda kóshbasshysy Artýr Ardavıchýstyń aıtýynsha, jarys kezinde atapqa ushyraǵan mototsıklshige qazaqstandyqtar kómek kórsetken. Keıinnen belgili bolǵandaı, ol belgili bıznesmenniń uly eken jáne qazaqstandyq kásipkerdiń senimdi seriktesi bolyp shyqty.
«Ushaqta men qazaqstandyq kásipkermen tanystym. Ol kópkúndik kezinde apatqa ushyraǵan mototsıklshi belgili sheteldik kásipkerdiń balasy ekenin jáne ol kásipker óziniń áriptesi ekenin aıtty. Sonymen qatar, otandasymyzdyń aıtýynsha, álgi jigittiń ákesi bizge alǵysyn jetkizýdi ótingen eken», - dedi Artýr Ardavıchýs.
Aıta keteıik, jarys kezinde qazaqstandyqtardyń aldynda kele jatqan Kolýmbııalyq mototsıklshi oqystan kóligimen birge omaqasa qulap, birneshe ret aýnap túsken bolatyn. Artýrdyń ekıpajy oǵan alǵashqy medıtsınalyq kómek kórsetip, ony alyp ketýge tikushaq shaqyrtqan edi.
Sonymen qatar, «Dakar-2015» jarysynda este qalarlyq taǵy bir jarqyn sát - bizdiń shabandozdarymyzdyń sheteldik áriptesterine et asyp bergeni boldy. Bolıvııadaǵy joldardyń birinde júrgizýshi Denıs Berezovskıı qazaqtyń ulttyq taǵamyn ázirlep, barlyq sheteldik shabandozdar men olardyń kómekshileriniń aldyna tartqan bolatyn.
«Astana» Prezıdenttik kásibı sport klýbynyń bas dırektory Vladımır Smırnov óz kezeginde jarysqa qatysýshylardy úzdik ondyqqa enýimen quttyqtap, alǵysyn bildirdi.
«Búkil elimiz sizderge jankúıer bolyp, ár kezeń saıyn qobaljyp, jetistikterińizden kóz jazbaı, baqylap otyrdy. Mundaı bedeldi jarysta úzdik ondyqqa iligý - bizdiń komandanyń jáne barsha halqymyzdyń úlken jetistigi. Men «Astana» ulttyq sport brendiniń esimi halyqaralyq sport alańynda laıyqty túrde tanystyryldy dep senimmen aıta alamyn», - dedi ol.
Esterińizge salaıyq, «Dakar-2015» 4 qańtarda bastalyp, 17 qańtarda máresine jetti. Jarystyń 14 kúninde qatysýshylar Argentına, Chılı jáne Bolıvııa elderiniń terrıtorııasymen toǵyz myńǵa jýyq shaqyrymdy basyp ótti. Jarysqa Qazaqstan atynan Astana Motorsport komandasynyń bir júk jáne úsh jeńil kólikten quralǵan tórt ekıpajy qatysty. Jalpy esepte olar úzdik ondyqqa ilikti.
