Astana Motorsports komandasy «Dakar 2015» marafonyn sátti bastady
ALMATY. QazAqparat- «Dakar» rallı marafonynyń birinshi kezeńi aıaqtaldy. Oǵan qatysýshylar Býenos-Aıresten Vılıa Karlos qalasyna deıingi aralyqty basyp ótti.
Birinshi kúni Astana Motorsports komandasynyń tórt ekıpajy úshin óte sátti aıaqtaldy. Bul týraly Astana Motorsports komandasynyń baspasóz qyzmeti habarlady.
«Dakar 2015» rallı marafonynyń jolyna barlyǵy 406 qatysýshy shyqqan. Qazaqstandyq ekıpajdar jarystyń alǵashqy kúni-aq tamasha nátıjege qol jetkizip, týrnır kestesinde mynadaı oryndardy ılendi: júk kólikteri kategorııasy boıynsha álemdegi eń myqty júrgizýshilerdiń jıyrmalyǵynda «Dakar 2012» marafonynyń qola júldegeri Artýr Ardavıchýstyń ekıpajy 13 orynǵa turaqtady. Al jol talǵamaıtyn avtokólikter kategorııasy boıynsha Aıdyn Rahymbaevtyń ekıpajy 22-shi orynǵa kóterildi. Baýyrjan Isabaev pen Denıs Berezovskııdiń ekıpajdary sáıkesinshe, 39-shy jáne 96-shy oryndarǵa ıe boldy.
Jalpy, qashyqtyǵy 800 shaqyrym bolatyn alǵashqy kezeńniń 170 shaqyrymdyq arnaıy ýchaskesin otandastarymyz asa qınalmaı baǵyndyrdy. Uıymdastyrýshylardyń aıtýynsha, bıyl klassıkalyq rallıge uqsas arnaıy ýchaskeler kóp bolmaq. Onda eń basty mindet - barynsha jyldam júrý.
- Jol shańdy boldy. Keıbir jerlerde joldan shyǵyp ketken kezderimiz boldy. Tipti bir ret jol jıegindegi butalardyń arasyna kirip kettik», - dedi óz sózinde «Astana» Prezıdenttik kásipqoı sport klýbynyń ókili Aıdyn Rahymbaev.
Al Baýyrjan Isabaevtyń aıtýynsha, trassa kúrdeli bolmaǵanymen jarysqa qatysýshylardan asa saqtyqty, shydamdylyqty, yjdaǵattylyqty talap etti. Óıtkeni, jekelegen jerlerde ozýǵa múmkindik bolmaǵan soń, kólikter biriniń artynan biri óte qysqa qashyqtyqta júrip otyrǵan.
Jarystyń basynda joldyń tarlyǵyna baılanysty kólikterdiń bir-birinen ozýy qıyn boldy. Ádette basymdyq beriletin ekıpajdarmen araqashyqtyq 2 mınýtty quraıtyn. Al bul jerde olaı bolmady. Jarys bastala salysymen kólikter bir-biriniń shańynyń astynda qaldy. Ashyq dalada ozýǵa bolar edi. Al munda jol óte tar boldy. Onyń ústine eki jaǵy qoralanǵan. Senen de baıaý ketip bara jatqandar seni jibermeıdi. Óıtkeni, ózderi de basqa bireýlerge tirelip bara jatty», - dedi óz sózinde ekıpaj múshesi Vladımır Demıanenko.
Shań Denıs Berezovskıı basqarǵan ekıpajǵa da qıyndyq týǵyzǵan.
«Basyp ozý qıyn boldy. Bir-eki ret joldan shyǵyp ta kettik. Ekinsht ret shyǵyp ketkende artymyzda kele jatqan baggı bamperimizdi «jaıpap» ketti. Degenmen, eshteńe etpeıdi. Endi, erteń, bir erekshe kezeń bastalaıyn dep otyr. Ol 500 shaqyrymnan asatyn arnaıy ýchaske. Onda ózender jıi kezdesedi», - dedi D. Berezovskıı.
Al búgin, qatysýshylar 600 shaqyrymnan asatyn qashyqtyqty basyp ótedi. Jol talǵamaıtyn kólikterge arnalǵan arnaıy ýchaske 518 shaqyrymdy, al júk kólikterine arnalǵan ýchaske 331 shaqyrymdy quraıdy. Ekinshi kezeńniń joly Vılıa Karlos pen San-Hýan qalalarynyń aralyǵyn alyp jatyr.
