«Astana Motors» mýltıbrendtik zaýytynda jabdyqtardy montajdaý bastaldy
ASTANA. KAZINFORM – Astana Motors Manufacturing Kazakhstan mýltıbrendtik avtokólik zaýytyna joǵary tehnologııalyq jabdyqtardy jetkizý salasyndaǵy álemdik kóshbasshy Automotive Engineering Corporation (QHR) ókilderi keldi.
Qytaı kompanııasynyń top-menedjmentiniń sapary jabdyqtardyń alǵashqy partııasynyń «Astany Motors» zaýytyna kelip túsýine týra keldi. Montajdaý jumystary Automotive Engineering Corporation (AE Corp.) ınjenerleriniń avtorlyq qadaǵalaýymen júrgiziledi.
Jabdyqtardy qabyldaýǵa AE Corp. prezıdenti Tszıa Sıdzıýn, vıtse-prezıdenti Chen Ion, eki vıtse-dırektor Lı Shoýsı men Van Sıaoleı jáne Astana Motors Manufacturing Kazakhstan zaýytynyń dırektory Maksım Tarasov qatysty. Tehnıkalyq jabdyqtardyń alǵashqy partııasy alańǵa 10 qyrkúıekte jetkizildi.
«Bizdiń Astana Motors Manufacturing Kazakhstan zaýytyna jetkizetin jabdyqtarymyz eń tehnologııalyq jáne eń zamanaýı jabdyqtar bolyp tabylady. Olar zaýytta shyǵarylatyn brendterdiń tehnıkalyq talaptaryna ǵana emes, sonymen qatar halyqaralyq standarttarǵa da sáıkes keledi», – dedi Tszıa Sıdzıýn.
«Astana Motors» mýltıbrendtik zaýytynda búkil jabdyqtardy ornatý kezeńinde jáne iske qosý-retteý jumystary kezeńinde AE Corp. ınjenerlik-tehnıkalyq quramynan 130 adam jáne Qazaqstannan shamamen 1 000 maman jumyldyrylady.
Almaty qalasynyń Indýstrıaldyq parkindegi Astana Motors Manufacturing Kazakhstan tolyq tsıkldi mýltıbrendtik zaýytynyń qurylysy 2022 jyly qarasha aıynda bastaldy. Bul jobany iske asyrý úshin «Astana Motors» 182 mlrd teńge ınvestıtsııa salady. Onyń ishinde 30%-y – menshikti qarajat, 70%-y – «Ónerkásipti damytý qory» AQ jáne «Qazaqstan Damý Banki» AQ qoldaýymen qarjy lızıngi jáne kredıtteý quraldary arqyly jyldyq 9% mólsherlemesimen 15 jylǵa berilgen qaıtarylmaly qaryz qarajaty. Qazirgi tańda zaýyttyń ǵımaraty qurylystyń sońǵy satysynda tur (90% daıyn).
Mýltıbrendtik zaýyttyń óndiristik qýaty jylyna usaq torapty ádispen shyǵarylatyn 90 000 avtokólikti quraıdy. Bul rette qazaqstandyq zaýytta óndirilgen mashınalardyń basym bóligi eksportqa jiberiletin bolady. Sonymen «Astana Motors» shyǵarylǵan avtokólikteriń jalpy kóleminiń 40%-yn otandyq naryqqa, 60%-yn TMD elderine eksportqa shyǵarýdy josparlap otyr.
Qurylys jumystary aıaqtalatyn josparly kún – 2024 jyldyń IV toqsany. 2025 jyldyń I toqsanynda jabdyqtardy ornatý jumystary jalǵasady, sodan keıin iske qosý-retteý jumystary júrgizilip, avtokólikterdiń pılottyq óndirisi iske qosylady.
Mýltıbrendtik zaýyt salý – «Astany Motors» kompanııasynyń naqty ındýstrııa qurý, avtokólik komponentterin óndirý, óndiristiń jergilikti jerde uıymdastyrylýyn tereńdetý sekildi jahandyq maqsatyndaǵy mańyzdy kezeńderdiń biri.
