«Astana Motors» kompanııasy Almatyda tolyq tsıkldi mýltıbrendtik zaýyt salyp jatyr
ALMATY. KAZINFORM – Almatyda Astana Motors Manufacturing Kazakhstan mýltıbrend zaýytynyń qurylys jumystary júrgizilýde. «Astana Motors» kompanııasy salyp jatqan zaýyttyń tolyq modeldik jelisi óndiristi pılottyq iske qosý aldynda usynylady. Jetekshi kompanııanyń eksporttyq josparlary týraly kásipker Nurlan Smaǵulov aıtyp berdi.
Astana Motors Manufacturing Kazakhstan mýltıbrend zaýytynyń quny – 182 mlrd teńge. Onyń 30%-y – menshikti qarajat, 70%-y – qaryzǵa alynǵan qaıtarymdy qarajat, 15 jylǵa Ónerkásipti damytý qory qarjy lızıngi jáne Qazaqstan damý banki kepildigi qarajaty (jyldyq 9% mólsherlemesi boıynsha) esebinen.
Astana Motors Manufacturing Kazakhstan – bul Qytaıdyń jetekshi úsh brendiniń (Chery Tiggo 2, Haval Jolion, Tank 300) modelderi shyǵarylatyn elimizdegi jalǵyz zaýyt. Ol sondaı-aq TMD aýmaǵynda dánekerleý jáne qurastyrý tsehtary ártúrli qabattarda ornalasqan jalǵyz jáne QR aýmaǵyndaǵy shanaqtardy avtomatty túrde taratatyn qoımasy bar alǵashqy zaýyt. Onda sonymen qatar qurǵaq koagýlıatsııa ádisi (aýany túrli-tústi aerozolden tazartý) paıdalanylatyn bolady. Bul – avtokólik jasaýdaǵy zamanaýı jasyl tehnologııa. Onyń búginde keń taralǵan sý tehnologııasynan aıyrmashylyǵy, sý men hımııalyq zattardy paıdalanbaıdy, kameradaǵy zııandy zattardy ustaýda 60% tıimdirek jáne elektr energııasyn 35% az paıdalanady.
Kásiporynnyń óndiristik qýaty – jylyna 90 myń avtokólik. Alaıda qazaqstandyq avtonaryqqa ónimniń 40%-y jóneltiledi. Al, 60%-y TMD elderine eksportqa jiberiledi.
«Astana Motors» portfelinde QHR jeńil avtokólikteriniń brendteri 2021 jyldan bastap paıda boldy. Nurlan Smaǵulovtyń pikirinshe, bul avtokólikter Qazaqstanda óz ornyn taýyp, aldaǵy ýaqytta úlken suranysqa ıe bolady. Óıtkeni qytaılyq kólikter biraz ýaqyt synaqtan ótken ári ony shyǵarýshylar ónimniń sapasyna senimdi.
Astana Motors Manufacturing Kazakhstan qurylysy qazaqstandyq ónerkásipti odan ári damytýdaǵy mańyzdy qadam bolmaq. Onyń qalaı jumys isteıtinin «Astana Motors» Astana Motors Manufacturing Kazakhstan janynda salynyp jatqan avtokomponentterdiń óndiristik klasteri arqyly kórsetýge nıettenip jatyr. «Astana Motors» SEO Beknur Nesipbaevtyń aıtýynsha, búkil álemde avtokólik salasy ofteık-kelisimsharttar esebinen jumys isteıdi jáne óndirýshilerdiń yntymaqtastyǵynyń osyndaı shemasyn Qazaqstanda avtokomponentter óndirý jónindegi kásiporyndardy ashý arqyly engizý qajet.
«Biz avtokomponentter, qosalqy bólshekterdi shyǵarýymyz qajet. Oryndyqtar, bamperler, mýltımedııalyq júıeler – bul osy joldyń basy ǵana. Biz úsh jyl ishinde Qazaqstanda shanaq, avtoshyny, kabel, lak-boıaý óndirisi paıda bolǵanyn qalaımyz. Bul «múmkin emes» dep qoryqpaýymyz kerek. Menińshe, mashınalardy qurastyrý kezeńi aıaqtaldy. Shynymdy aıtsam, ol jetkilikti túrde biraz ýaqytqa sozyldy. Biz avtokólik óndirýshilerine qoıylatyn talaptardy barǵan saıyn kúsheıte túsýimiz kerek. Bizdiń múmkindigimiz kórshiles Ózbekstan men Reseıden kem emes dep esepteımin», - dedi Nurlan Smagulov.
«Astana Motors» ónerkásip jáne qurylys mınıstrliginiń kýrsyn qoldaıdy, avtokólik komponentterin óndirýdi, ónerkásipti, mashına jasaýdy jáne avtokólik jasaýdy damytýǵa óz úlesin qosady.
Zaýytty salý qazaqstandyq ınjenerler men qurylysshylar arqyly júzege asyrylady. Olardyń úlesi 90%-dy quraıdy. Tek 10%-y avtokólik zaýyttaryn salýǵa mamandanǵan ınjener-keńesshilerge tıesili.
Qurylys kezinde paıdalanylatyn materıaldardyń 50%-dan astamy – qazaqstandyq ónim, al keıbir pozıtsııalar boıynsha olardyń úlesi (beton, metalprokat, jeldetý kommýnıkatsııalary) 100%-ǵa jetti.
Aıta keteıik, jańa zaýytta pılottyq óndiristi bastaý 2025 jyldyń I toqsanyna josparlanyp otyr.
