Astana meıramhanalarynda ıt eti qoldanylyp jatqany ras pa
ASTANA. KAZINFORM — Astanada ıt etiniń qoǵamdyq tamaqtaný oryndarynda satylyp jatqany týraly aqparat shyndyqqa sáıkes kelmeıdi. Bul týraly «Astana Vetservıs» kommýnaldyq memlekettik kásiporny málim etti.
Vedomstvonyń habarlaýynsha, atalǵan qaýesetter 2023 jyly Aqmola oblysynda tirkelgen oqıǵalarmen baılanysty. Sol kezde janýar tektes ónimderdiń zańsyz aınalymy anyqtalyp, quqyq qorǵaý organdary tarapynan tıisti tekserý júrgizilgen. Nátıjesinde kináli tulǵalar sot sheshimimen jaýapkershilikke tartylǵan.
— Qazirgi ýaqytta elorda aýmaǵynda meıramhanalarda, kafeler men ashanalarda ıt etin jetkizý, satý nemese paıdalaný faktileri resmı túrde tirkelmegen, — delingen habarlamada.
Sondaı-aq, veterınarııalyq-sanıtarııalyq baqylaý elordada turaqty túrde júrgiziletini atap ótildi.
Aıta keteıik, Jetisý oblysynda ıt asyraýshylarǵa ǵylymı qoldaý kórsetetin Ulttyq ortalyq ashylatyny belgili boldy.
Buǵan deıin Óskemen qalasynda buralqy ıtterdiń qaptap júrgenin, ásirese Jibek-matalar kombınaty yqshamaýdany men Ahmer kentiniń turǵyndary jıi aıtyp júr. Al janýarlar janashyrlary mundaı jaǵdaıǵa keıde adamdardyń ózderi kináli ekenin alǵa tartady.
