Astana meshitterinde Qurban aıt namazy tańǵy saǵat 8:10-da oqylady
ASTANA. 10 qazan. QazAqparat - Bıyl elordada Quban aıt namazy 15 qazan kúni tańǵy saǵat 8-den 10 mınýt ketkende bastalady. Bul týraly búgin Astanada ótken baspasóz máslıhatynda «Nur Astana» ortalyq meshitiniń Bas ımamy Naýryzbaı Ótpenov aıtty.
«Alla buıyrtsa, ústimizdegi jyldyń 15 qazanynda qasıetti Qurban aıttyń birinshi kúni bastalady. Osy kúni árbir musylman tańerteń turyp, tazalanyp, taza kıimderin kıip, meshitke baryp, Quban aıt namazyn jamaǵatpen birge oqyp, Allaǵa minájat etip, qulshylyqpen bastaıdy. Ary qaraı shamasy kelgen árbir jan qurbandyq shalýǵa kirisedi», - dep toqtaldy Bas ımam.
Osy oraıda ol qurbandyqqa túıe, iri qara mal, qoı jáne eshki shalynatynyn eske salyp ótti. «Jalpy túıe bes jasqa, qara mal eki jasqa, qoı bir jasqa tolǵan bolýy qajet. Eger de soıýǵa jaramdy bolsa, 6 aılyq toqty da jaraıdy. Al endi eshki bir jasqa tolýy shart bolyp esepteledi», - dedi N. Ótpenov.
Osy oraıda ol qurbandyq aıt namazy oqylǵannan keıin shalynýy tis ekenin eskerip ótti.
Esterińizge sala keteıik, Qurban aıt merekesiniń alǵashqy kúni elimizde demalys kúni retinde belgilengen.
