Astana meshitteri muqtajdarǵa tegin kómir jetkizip, ystyq tamaq taratty
Astana qalasy meshitteriniń bastamasymen azamattar jumylyp, aıaldamalarda qoǵamdyq kólikterdi kútip qalǵan qala turǵyndaryn dittegen jerine tegin jetkizip, jol tazalaıtyndar men qurylysshylarǵa tegin ystyq tamaq taratty. Sondaı-aq, qaıyrymdylyq sharasy barysynda úıin jylyta almaı otyrǵan 25 otbasyǵa kómir jetkizilip beriledi.
«Aıazdy kúnderi turǵyndarǵa barynsha járdemdesý, kómekke muqtaj kisilerge, januıalarǵa qol ushyn sozý - aktsııamyzdyń basty maqsaty. Keshe turmysy tómen 4 úıge kómir jetkizildi. Ár aýlaǵa 1,5 tonnadan otyn túsirildi. Aptanyń sońyna qaraı 2 tonnaǵa deıin kóbeıtip, 25 otbasyna kómir jetkiziledi dep kózdep otyrmyz», - dep málimdedi «Nur Astana» meshitiniń ustazy Іlııas Otarov.
Onyń málimetine súıensek, eki kúnde 400 adamǵa tegin ystyq tamaq taratylǵan. Olardyń arasynda aıaldamada avtobýs kútkneder, kóshe tazalaıtyndar men qurylysshylar bar.
Sonymen qatar, aktsııa kezinde arnaıy logotıpteri bar kólikter aıaldamalarda qoǵamdyq avtobýstardy kútip turǵandardy dittegen jerine tegin jetkizedi. Іlııas Otarovtyń aıtýynsha, shara týraly áleýmettik jeliden bilgen turǵyndar oǵan óz úlesterin qosyp jatyr.
«Aktsııanyń basynda 20 kólik bolsa, búgin bizdiń qatarymyzda 50 shaqty júrgizýshi bar. Olardyń kólikterine ózimizdiń arnaıy logotıpimizdi jabystyryp, taksıdiń sharttaryn qoldaryna ustatyp, kólikterdi jiberip jatyrmyz. Mashınasy joq kisilerdiń, tańerteń kóligi ot almaı jatqan adamdardy taksılerge otyrǵyzyp, qyzmet úshin óz aqshasyn tólegen jaǵdaılar da kezdesedi. Kúnniń sýyǵyna qaramastan qalalyqtardyń jan jylýyn, júreginiń keńdigin, meıirimdiligin kórsetip jatqan jaıy bizdi qýantady», - dep túıindedi ol.
«Astana - meıirimdi qala» aktsııasy aıaz kúshi qaıtqansha jalǵasady.
