Astana meshitteri aıazdy kúnderi qala turǵyndaryna tegin taksı usynady
Aktsııa úsh negizgi baǵytta júrgiziledi, onda elorda turǵyndaryna tegin taksı qyzmetin uıymdastyrý, muqtaj jandarǵa kómir jetkizý jáne kóshedegi tazalyqshylar men qurylysshylarǵa ystyq sháı men tamaq usyný kózdelip otyr.
Qaıyrymdylyq aktsııasyna kez kelgen qala turǵyny qatysa alady.
«Byltyr da aıazdy kúnderi kishigirim bastamalar kóterildi. Bıyl Astananyń 8 meshiti birigip, aýqymdy qaıyrymdylyq sharasyn atqarǵaly otyr. Búgin tańǵy 8-de bastalǵan shara aıasynda 200 adamǵa ystyq sháı men tamaq berildi. Jamaǵattan jınalǵan qarajatqa kómir alyp, ony muqtaj jandarǵa, shamamen 10 otbasyna 3 tonnadan túsirip berýdi josparlap otyrmyz. Kólikke muqtaj jandarǵa tegin taksı qyzmetin de usynamyz», - dep jaýap berdi «Nur Astana» meshitiniń bas ımamy Asqar Muqanov QazAqparat tilshisiniń saýalyna.
Bas ımamnyń aıtýynsha, qazirgi ýaqytta qala ishinde 25 kólik qala turǵyndaryn tegin tasyp júr jáne munda jolaýshynyń qaýipsizdigine basa mán beriledi.
«Tegin taksı qyzmetine atsalysý úshin júrgizýshi eń aldymen meshitke kelýi kerek. Onyń kóliginiń jaı-kúıin, júrgizý kýáligin tekseremiz, telefon nómiri men aty-jóni, mekenjaıyn jazyp alamyz jáne jolaýshynyń qaýipsizdigi týraly birqatar erejelerdi túsindiremiz. Sodan keıin ǵana, meshit atynan qaıyrymdylyq sharasyna qatysýyn maquldap, kólik terezesine arnalǵan kishigirim bannerimizdi beremiz. Meshitke qarttar jıi habarlasady, olardy da dittegen jerine jetkizip tastaýǵa tyrysamyz», - dep óz sózin tolyqtyrdy bas ımam.
Qaıyrymdylyq aktsııasy aıazdyń beti qaıtqansha jalǵasatyn bolady. Kómek qolyn sozǵysy kelgen turǵyndar ummet.kz saıtynda kórsetilgen telefon nómirlerine habarlasa alady.
Tegin taksı qyzmetin paıdalanǵan qala turǵyndary áleýmettik jelide óz rızashylyqtaryn bildirip úlgerdi.
