Astana meshitinde bolǵan órt saldarynan qaza tapqan adamnyń tulǵasy anyqtaldy

QR TJM-nyń baspasóz qyzmetinen málim etkendeı, ol - «Asqar» Jeke kásipkerliginiń sylaqshysy, 1989 jyly dúnıege kelgen Baýyrjan Maralbek.

«Órttiń shyǵýynyń sebebi men keltirilgen shyǵyndy anyqtaý boıynsha jumystar jalǵasýda», delingen vedomstvonyń baspasóz qyzmeti taratqan habarlamada.

Eske salaıyq, elordada jańadan salynyp jatqan «Haziret Sultan» meshitinde órt keshe, 15 qańtar kúni boldy. Tótenshe jaǵdaı týraly habar saǵat 15.19-da tústi. Qutqarýshylar oqıǵa ornyna 10 mınýttan soń jetip, órtke oranǵan ǵımarattan 13 adamdy aman-esen alyp shyqty. Tilsiz jaýdy aýyzdyqtaýǵa TJD-niń 171 qyzmetkeri men 35 tehnıkasy jumyldyryldy. 800 sharshy metr aýmaqty sharpyǵan jalyn saǵat 17.49-da tolyǵymen aýyzdyqtaldy.