Astana meshitinde aıaq kıim urlaǵan er adam ustaldy
ASTANA. QazAqparat - Astanada meshitterdegi urlyq oqıǵalaryna qatysty sotqa deıingi tergeý amaldary júrip jatyr, dep habarlaıdy QazAqparat qalalyq ákimdik saıtyna silteme jasap.
Buǵan deıin qala turǵyny 28 qazanda «Nur-Astana» meshitinde aıaq kıimin urlatqany týraly polıtsııaǵa shaǵym túsirgen.
«Meshit kireberisinde bolǵan urlyq faktisi beınebaqylaý kamerasyna túsip qalǵan. 31 qazanda polıtsııa qyzmetkerleri jedel izdestirý sharalaryn júrgizdi jáne kúdikti - Túrkistan oblysynyń 26 jastaǵy turǵyny «Haziret Sultan» meshitinde kezekti urlyq ústinde ustaldy. Atalǵan faktilerge qatysty QR QK 188-babyna («Urlyq») sáıkes sot aldy tergeý amaldary júrip jatyr», - dep jazdy ákimdik saıty.
Urlanǵan zattar óz ıelerine qaıtaryldy jáne kúdiktiniń osyǵan uqsas oqıǵalarǵa qatysy bar-joǵy tekserilip jatyr.
«Astananyń tártip saqshylary elorda turǵyndary men qonaqtaryna qoǵamdyq oryndarda urlyq jıi jasalatyndyǵyn eske salady. Polıtsııa departamentiniń qyzmetkerleri azamattardy qyraǵy bolyp, óz zattaryna abaı bolýǵa shaqyrady. Osy azamattyń áreketterinen zardap shekken turǵyndardy Esil aýdandyq ishki ister basqarmasyna habarlasýyn suraımyz», - delingen habarlamada.
