Astana merekesine qarsańynda elordadan Býrabaıǵa jáne Pavlodarǵa poıyzdar qatynaıdy
ASTANA. 4 shilde. QazAqparat - QR Kólik jáne kommýnıkatsııa mınıstrligi turǵyndardyń kóptegen ótinishterin eskere otyryp, Astana kúnin toılaý qarsańynda Astanadan qatynaıtyn baǵyttardyń ishinde úlken suranysqa ıelerine jańa temirjol quramyn shyǵarý máselesin sheshti.
Atap aıtqanda, 5 shildede Astana - Býrabaı kýrorty baǵytynda júrdek poıyz jolǵa shyqpaq. QR Kólik jáne kommýnıkatsııa mınıstrliginiń Kólik jáne qatynas komıteti mamandary jańa quramnyń jolaýshylarǵa jaıly, árqaısysy 56 oryndyq 6 vagonnan quralǵanyn aıtady. Poıyz aptasyna úsh ret: juma, senbi, jeksenbi kúnderi qatynaıdy. Júrý ýaqyty - 3 saǵat 55 mınýt. Astana qalasynyń vokzalynan keshki saǵat 21:10 mınýt ótkende júrip ketedi.
Sondaı-aq, 2013 jylǵy 8 shildeden bastap Astana - Pavlodar baǵytyndaǵy jańa quram da jolǵa shyǵady. Búgingi kúni atalǵan baǵyt boıynsha aptasyna 4 ret: beısenbi, jumy, senbi jáne jeksenbi kúnderi qatynaıtyn poıyz bar. Al, jańa júrdek jolaýshylar quramy kún saıyn qatynaıtyn bolady jáne jolaýshylarǵa barlyq jaǵdaı jasalǵan 6 vagonmen jabdyqtalǵan. Astana qalasynyń temirjol vokzalynan saǵat 18:40-ta júrip ketedi, al jolda júrý ýaqyty 6 saǵat 28 mınýtty quraıdy.
