«Astana merekesi Kedendik odaqtyń tusaýyn kesti» - respýblıkalyq basylymdarǵa sholý

***

Keshe Premer-Mınıstr Kárim Másimov jumys babyndaǵy saparmen Aqmola oblysynda boldy. Úkimet basshysy men onyń janyndaǵy resmı adamdar óte tyǵyz kestedegi jumys barysynda mańyzdy on nysanda bolyp, keńeıtilgen tórt keńes ótkizdi. Osyǵan oraı «Egemen Qazaqstan» gazetinde «On nysannyń oń qadamy óńir ómirin árlendirýge jol ashpaq» degen taqyryppen maqala basyldy. "Úkimet basshysynyń óńirlerge jasaǵan árbir sapary jumys istep turǵan, qurylysy júrgizilip jáne qaıta jaraqtandyrylyp jatqan kásiporyndardyń jumysyna serpin qosyp, basshylar men mamandardyń, ujym músheleriniń óz mindetine jańasha ekpin berip, jaýapkershilikti eseleı túsetini belgili. Úkimettiń kúndelikti nazar salýy men qoldaýynyń arqasynda Aqmola oblysyndaǵy kókeıkesti máseleler oń sheshimin tabýda», dep jazady basylym. Premer-Mınıstr Kárim Másimov oblys ákimdiginde Aqmola, Soltústik Qazaqstan, Qostanaı oblysy ókilderiniń qatysýymen keńes ótkizdi. Úkimet basshysy óziniń qorytyndy sózinde Aqmola oblysyndaǵy ıgi qadamdarǵa qoldaý kórsetý qajettigin atap kórsetip, turǵyndardyń qalypty tirshiligin qamtamasyz etýdegi Elbasy tapsyrmasynyń minsiz oryndalýyn talap etken. Al, soltústik óńirdi suıyq otynmen qamtamasyz etýge baılanysty másele eki aptadan keıin Úkimet otyrysynda arnaıy qaralmaq.

«Shildeniń 6-synda Osloda (Norvegııa) ashylǵan EQYU Parlamenttik Assambleıasynyń jyl saıynǵy 19-shy sessııasynda Qazaqstannyń EQYU-daǵy tóraǵalyq etýine joǵary baǵa berildi», dep jazady «Egemen Qazaqstan» gazeti. Ashylý saltanatynda sóz alǵan EQYU PA Tóraǵasy Joao Soaresh «Qazaqstan óz tóraǵalyǵyn erekshe qarqynmen júrgizip keledi», dep atap ótken. Sessııaǵa qatysýshylar bıylǵy mamyr aıynda Almatyda bolǵan Transazııalyq parlamenttik forým qorytyndylaryn talqylady. Parlamentshiler atap ótkendeı, Almaty keńesinde aıtylǵan usynystar men ıdeıalar Norvegııa astanasynda ótken Assambleıa sessııasynda qabyldanatyn jekelegen qararlardyń jobalarynda kórinis tabatyn bolady.

«Egemen Qazaqstan» gazetiniń beısenbilik nómirinde álem elderiniń basshylary, saıasatkerleri jáne óner qaıratkerleriniń Elbasy Nursultan Nazarbaev týraly aıtqan pikirleri toptastyrylyp berilgen. Basylymnan AQSh Prezıdenti Barak Obamanyń, Reseı Prezıdenti Dmıtrıı Medvedevtiń, QHR Tóraǵasy Hý Tszıntaonyń, BUU Bas hatshysy Pan Gı Mýnnyń, Túrkııa Prezıdenti Abdýlla Gúldiń pikirlerin oqı alasyzdar.

***

«Alash aınasy» gazetinde «Astana merekesi Kedendik odaqtyń tusaýyn kesti» degen taqyryppen berilgen maqalada EýrAzEQ sammıtiniń aıasynda jeke bas qosqan N.Nazarbaev, D.Medvedev jáne A.Lýkashenko ortaq keden keńistigin quryp qana qoımaı, yqpaldastyqtyń kelesi kezeńine - birtutas ekonomıkalyq keńistik qurý satysyna kiriskeni týraly jazylǵan. Sonymen qatar Tájikstan men Qyrǵyzstannyń Kedendik odaqqa kirý nıeti týraly jáne Reseı basshysynyń Elbasy N.Nazarbaevtyń ortaq valıýta ıdeıasyna úlken qoldaý bildirgeni týraly baıandalǵan.

«Sýdan keletin sum ajaldan qalaı qutylamyz?». «Alash aınasy» gazetiniń beısenbilik nómirinde osy taqyryppen berilgen maqalada el turǵyndardyń sýǵa batyp, qaza bolyp jatqandar sany jyldan-jylǵa kóbeıip bara jatqandyǵy aıtylǵan. Senimdi derek kózderine qaraǵanda, Qazaqstannyń sý qoımalarynda búginde 215 adam qaıtys bolsa, sonyń 50 paıyzynan kóbi balalar. Osy máselege pikir bildirgen Mańǵystaý oblystyq TJD sýdan qutqarý qyzmetiniń bastyǵy Bıaman Túıebaev mamannyń jetkiliksizdigin, onyń ústine jalaqynyń nebary 20-25 myń teńge ekenin jáne tehnıkalyq bazanyń tozǵanyn aıtsa, al depýtat Murat Ábenov «iri qalalardaǵy sýǵa túsetin demalys oryndaryn memlekettiń qaramaǵyna alyp, ondaǵy qaýipsizdik sharalaryn qatań baqylaý qajet» degen oı aıtady.

Osy basylymnyń «Dat!» aıdarynda boıynsha Qazaq ulttyq óner ýnıversıtetiniń rektory, professor Aıman Musaqojaevamen aradaǵy suhbat «Bizge tól mádenıetimizdi damytatyn ulttyq baǵdarlama qajet» degen taqyryppen jarııalanǵan. «Bizge Qazaq ulttyq sımfonııalyq orkestri kerek-aq. Sebebi damyǵan batys elderiniń bárinde bundaı orkestr bar. Anglııada nemese Frantsııada, Londondyq nemese Parıjdik sımfonııalyq orkestr degen bar. Olar osyndaı qundylyqtary arqyly álemge máshhúr bolyp otyrǵanyn umytpaǵanymyz jón. Bizge eń aldymen tól, ulttyq mádenıetimizdi damytatyn jáne talantty jastardy álemdik deńgeıge kóterýge baǵyttalǵan ulttyq baǵdarlama kerek», deıdi ol «Alash aınasy» gazetine bergen suhbatynda.

***

«Elbasy Nursultan Nazarbaev «Nur Otan» partııasynyń atynan erekshe syılyq aldy», dep jazady «Aıqyn» gazeti. Basylymnyń atap ótýinshe, partııa tóraǵasynyń birinshi orynbasary N.Nyǵmatýlın Prezıdentke - partııa jetekshisine úlken albom syıǵa tartqan. Onda atalǵan partııa uıymdastyrǵan búkilhalyqtyq «Otandastar» aktsııasy barysynda Qazaqstan azamattarynan kelip túsken quttyqtaýlar toptastyrylǵan.

Osy basylymda AQSh-tyń Indıana ýnıversıtetiniń professory Ýılıam Fıermannyń qazaq tili jaıynda pikirleri jarııalandy. «1991 jyldan bastap Qazaqstan egemendik alǵannan beri eldegi saýattylyq deńgeıi óte joǵary bolatyn. ıaǵnı bul kórsetkish 95 paıyzdan asatyn. Biraq bul saýattylyqó memlekettik tilde emes edi. Eń qyzyǵy, Qazaqstandaǵydaı tildik jaǵdaı álemde joq. bylaı qarasaq, memlekettik til - qazaq tili. Memlekettiń aty - Qazaqstan. Azııanyń ózgeelderine qaraǵanda, saýattylyq ta joǵary deńgeıde, memleket te baı. Biraq mundaǵy tildik jaǵdaıdy eshbir elmen salystyrýǵa bolmas», depti professor. Ǵalymnyń pikirlerin tolyq oqyǵyńyz kelse basylymnyń búgingi sanyndaǵy «Qazaqstandaǵy tildik jaǵdaıdy eshbir elmen salystyra almaısyń» degen maqalaǵa nazar aýdaryńyzdar.

***

«Astana aqshamy» gazetiniń beısenbilik nómirinde qala ákimi Imanǵalı Tasmaǵambetovtiń «Erke Esildiń boıyna el qondyrǵan» degen taqyryppen maqalasy jarııalandy. «Óziniń múshel jasyna qadam basqan Astananyń qalaı órkendep, qalaı damý kerektigin jaqsy bilemiz. Muny elordany turǵyzýshy, onyń bas sáýletkeri Nursultan Ábishuly árdaıym esimizge salyp otyrady. Elimiz táýelsizdik alyp, Qazaqstannyń tórt buryshyndaǵy oblys ataýlary arqyly eldiń tutas aýmaǵyn belgilegen kezden bastap Elbasymyzdyń kúndiz oı-sanasynda, túnde túsinde kóretin elordasyn sol maqsat-mindetterge sáıkes órkendete bilsek, bul oljadan kelgenimiz. Qazirgi barlyq qyzmetimiz sol maqsatqa baǵyndyrylǵan. Elorda men Elbasy egiz uǵymǵa aınalǵaly da talaı ýaqyt boldy. Búginde halqymyz elordany Elbasynyń eren erligi, eliniń erteńin oılap jasaǵan uly sheshimi dep biledi. Sol úshin de qurmet tutady. Astana aýystyrý týraly sheshim kezinde Elbasynyń týǵan kúninde qabyldanǵan. Bul - uly kún», dep jazady maqala avtory.

***

Memleket basshysynyń atyna Elorda kúnine jáne Qazaqstan Respýblıkasynyń Prezıdenti Nursultan Ábishuly Nazarbaevtyń mereıjasyna baılanysty Qazaqstan azamattary men uıymdarynan kóptegen quttyqtaý jedelhattar men hattar kelip túsýde. Olardyń birparasy «Kazahstanskaıa pravda» gazetiniń beısenbilik nómirinde toptastyrylyp berilip otyr. Máselen, Qazaqstannyń halyq ártisi Oraz Ábishev «Siz bizdiń respýblıkamyzdyń damýyna jáne órkendeýine baǵa jetkizgisiz úles qostyńyz. Sizdi - Elbasy dep taný, sondaı-aq, sizdiń atyńyzben halyqaralyq deńgeıdegi jańa ýnıversıtettiń atalýy - Sizdiń qyzmetińizge berilgen laıyqty baǵa», depti. Sondaı-aq Elbasy atyna kelip túsken hattar men jedelhattar «Egemen Qazaqstan» gazetinde de jaryq kórdi.