Astana merekesi bastaldy

Elimizdiń barlyq mádenı-tarıhı, sáýlet eskertkishterin ón-boıyna jınaqtaǵan «Atameken» etno-memorıaldyq kesheninde Memleket basshysy Nursultan Nazarbaevtyń qatysýymen elimizdiń Memlekettik týyn kóterý rásimi ótti. Shara barysynda Elbasy kýrsanttarǵa ofıtserlik pogondar tabys etti.

Shildeniń 4-i ártúrli merekelik qyzyqty baǵdarlamalarǵa toly. Tańǵy saǵat 10-nan keshki 9-ǵa deıin elordanyń barlyq saıabaqtarynda, skverlerinde qala halqy men qonaqtarynyń kóńil kóterýine múmkindik beretin is-sharalar ótedi. Kóńil kóterý baǵdarlamalary «Qazaqstan» sport kesheni aýmaǵyndaǵy «Stýdenttik» saıabaǵynda, «QazMunaıGaz» aldyndaǵy alańda, B.Momyshuly dańǵyly boıyndaǵy «Jeruıyq» saıabaǵynda, Astanalyq saıabaqta, qalalyq alańda, sonymen qatar «Jastar» saraıy aldynda uıymdastyrylǵan. Kontsert alańdarynda arnaıy shaqyrylǵan shyǵarmashylyq ujymdar, sıqyrshylar, kóńildi kloýndar, hıp-hop baǵytyndaǵy toptar, bı ujymdary óner kórsetedi. Sonymen qatar merekelik sharalardy uıymdastyrýshylar kóptegen vıktorınalar, konkýrstar da uıymdastyrýda.

Astana qonaqtary men turǵyndary saǵat 10-nan bastap qalanyń úsh aýdanynda, Abylaı han dańǵyly boıynda, Esil aýdandyq halyqqa qyzmet kórsetý ortalyǵy jáne «Shapaǵat» bazary aýmaqtarynda uıymdastyrylǵan óndirýshilerdiń baǵasymen aýyl sharýashylyǵy ónimderiniń jármeńkesinde bolyp, qajetti azyq-túlikterdi ortasha naryqtyq baǵadan 15-20 paıyzǵa tómen satyp alýǵa múmkindik alady. Jármeńkege Astananyń jáne Aqmola men Qaraǵandy oblystarynyń 60-tan astam taýar óndirýshileri qatysady. Aýyl sharýashylyǵy ónimderiniń jalpy kólemi 500 tonnaǵa jýyq

Al saǵat 11-den bastap arnaıy daıyndalǵan «Astana - shattyq» avtokerýeni kontserttik baǵdarlamamen elordanyń Kóktal, Óndiris, Jeleznodrojnyı, Mıchýrın jáne Ilınka eldi-mekenderin aralaıdy. Uıymdastyrýshylar qala qonaqtaryn folklorlyq ansamblderdiń, tsırk ártisteriniń ónerleri tánti etip, halyq ánderi men bıleri kóńilderinen shyǵady dep senedi.

Al saǵat 12-de qalalyq alańda «Aspazdardyń sheberligi - súıikti qalaǵa» dep atalatyn 3 kúnge sozylatyn aspazdyq jármeńkesi bastalady. Shara elordanyń kásibı aspazdarynyń basyn biriktiredi. Oǵan úzdik meıramhanalar, dámhanalar, aspazdyq oryndardyń ókilderi qatysady. Jármeńke barysynda qala turǵyndary men qonaqtaryna arnap Astana qalalyq fılarmonııasynyń ártisteri óner kórsetedi.

Dál osy mezette sport jankúıerleri úshin qalanyń sol jaǵalaýynda «Astana kýbogy» velojarysy bastalady. Sporttyq sharaǵa kásibı sportshylarmen qatar qala turǵyndary men qonaqtary da qatysýǵa múmkindigi bar. Uıymdastyrýshylardyń atap óýtinshe, jarysqa «Astana» velokomandasynyń kóshbasshylary Aleksandr Vınokýrov, Alberto Kontodor syndy qurmetti qonaqtar da qatysady. Saıys aıasynda lotereıa bıletteri de oınatylyp, utysqa atalǵan komanda músheleriniń qoltańbasy qoıylǵan sporttyq kıimder beriledi.

Saǵat 15:00-de Esil ózeniniń jaǵalaýynda jáne «Báıterek» monýmenti janynda qyzyqty eki birdeı, atap aıtqanda «Astananyń jas kelbeti» jáne «Astana jáne Prezıdent» kórmeleri ashylady. Birinshi kórme aıasynda kelýshiler qylqalam sheberleriniń shyǵarmashylyq jumysynyń qalaı týatynyn óz kózimen kórýine múmkindik beretin keńeıtilgen plener ótkiziledi. Al ekinshi kórmede 100-ge jýyq fotojumys qoıylǵan. Onda Elbasynyń jáne Astana shaharynyń sýretterin tamashalaýǵa múmkindik bar.

Astanalyq tsırkte «Azııa jańǵyryǵy» atty tsırk óneriniń halyqaralyq festıvali jalǵasýda. Kelýshiler úshin 12 eldiń tsırk maıtalmandary óner kórsetedi.

Al elordanyń eń jas ári belsendi jastary úshin B.Momyshuly atyndaǵy saıabaq amfıteatrynda, saǵat 17:00-de «International street dance session» in Astana. Kreatıvti shoý» ótedi. Oǵan Qyrǵyzstan, Reseı, Belarýs, Ýkraına, Ózbekstan jáne Qazaqstannyń barlyq oblystarynan jastar qatysady. Erekshe shoýdyń qonaqtary retinde amerıkandyq Misha Gabriael men germanııalyq Harris Hodovic óner kórsetedi.

Astana keshi elordanyń aýdandary usynǵan merekelik baǵdarlamalarmen jalǵasady. «Báıterek» monýmenti aldynda «Esil - dostyq ózeni», qalalyq ákimdik alańynda «Saryarqa - bizdiń tatý otbasymyz», al Almaty aýdanynyń merekelik baǵdarlamasy «Otan qorǵaýshy» alańynda ótedi. Esil aýdandyq ákimdigi daıyndaǵan merekelik baǵdarlama aıasynda «Qala meniń taǵdyrymda» baıqaýy ótkiziledi. Baıqaý shartyna sáıkes qala turǵyndary astanamen baılanysty ómirleriniń qyzyqty da shýaqty sátterin kópshilik kókeıine jetkize bilýi kerek. Baıqaý jeńimpazdary maqtaý qaǵazymen, syılyqtarmen marapattalady.

Elorda keshi saǵat 19:00-de Beıbitshilik pen kelisim saraıynda basty rólde reseılik ártis Sergeı Bezrýkov oınaıtyn, orys aqyny Sergeı Esenınniń ómirine arnalǵan «Buzaqy» mýzykalyq-poetıkalyq qoıylymmen bastalady. Óner súıer qaýym orys akterin kompozıtor retinde de baǵalaýǵa múmkindik alady, óıtkeni ol Esenın óleńderine mýzyka jazǵan bolatyn.

Astana merekesin uıymdastyrýshylar qala kúnine erekshe syı retinde talantty orys pıanısi Denıs Matsýevtiń klassıkalyq mýzyka kontsertin tartý etip otyr. Onyń jeke kontsertteriniń geografııalyq aýmaǵy óte keń. Ol álemniń bedeldi, atap aıtqanda Nıý-Iorktiń Carnegie Hall, «Lincoln Center», Vashıngtonnyń Kennedy Center, Parıjdiń Salle Gaveau, Theatre des Champs Elysees, Londonnyń Royal Festival Hall, Mılannyń la Scala teatrynyń zaldarynda kontsert beredi. Al búgin 19:00-de elordanyń «Qazaqstan» ortalyq kontsert zalynda Qazaqstan halqy onyń ónerin tamashalaýǵa múmkindik alady.

Al túnge qaraı belsendi merekelik kúnnen keıin demalý sáti týyndaıdy. Esil ózeniniń jaǵalaýynda astanalyqtardyń súıikti baǵdarlamasyna aınalyp úlgergen «Ózen áýeni» klassıkalyq mýzyka keshi saǵat 21:00-de bastalady. Úsh kún boıy ótetin bul aspapty áýen keshiniń aǵymdaǵy jylǵy jańalyǵy - aspan astyndaǵy balet bıi. Osy kúnderi erke Esil jaǵalaýynyń boıynda shyrqalǵan ásem áýenge elite, qalyqtaı bılegen kásbiı bıshilerdiń ónerlerine tánti bolady. Búgin qala turǵyndary men qonaqtary Chaıkovskııdiń «Aqqý kóli» baletin tamashalaıdy.

Sonymen qatar búgin «Stýdenttik» saıabaqta, «Báıterek» monýmenti aldyndaǵy jáne qalalyq alańdarda «Qaıyrly kesh, Astana!» merekelik baǵdarlamasy ótip, tyńdarmandardy ǵajaıyp án álemine elitýge múmkindik beredi. Kesh qonaqtaryna Marjan Arapbaeva, Nurǵalı Turlybekov, Ǵanı Jumasheva, Medet Shaıkelov, sondaı-aq «Evrazııa», «Adajıo» shoý-baletteri óner kórsetedi. Al «Stýdenttik» saıabaqta «Astana Never Sleeps» bı keshi ótedi. Qalalyq alań bul kúnderi bı men ázildi baǵalaıtyndardyń basyn qosady. Astananyń aldyńǵy qatarly dı-djeıleri, «Breık dans» úzdik bıshileri, sonymen qatar albyrt KTK komandalary sahna tórine kóteriledi.

Osylaısha Astana kúni merekesiniń birinshi kúni aıaqtalady, alaıda erteń tańerteńnen merekelik is-sharalar qaıtadan jalǵasyn tabady.