«Astana - meniń ómirimniń áýeni» baıqaýynyń bas júldesin almatylyq ánshi jeńip aldy
STANA. Mamyrdyń 13-i. QazAqparat - Elordada «Astana - meniń ómirimniń áýeni» atti birinshi respýblıkalyq aýqymdaǵy án baıqaýynyń gala-kontserti ótti. Birinshi oryndy almatylyq jas ánshi Erkin Máýlen enshilese, 2-3-shi oryndardy qaraǵandylyq Gúlbaný Serikova men almatylyq dýet «Altyn-Araı» bólisti.
Júldeli oryndar úshin Astana, Almaty, Qaraǵandy, Oral, Óskemen, Kókshetaý, Qyzylorda jáne Mańǵystaýdan kelgen 19 oryndaýshy óz baqtaryn synady. Mamyrdyń 11-inde ótken irikteý kezeńinde konkýrsanttar Qazaqstannyń elordasy Astanaǵa arnalǵan ánderin oryndaǵan bolatyn. Al ekinshi kezeńde olar ózderiniń qalaýy boıynsha ázirlep kelgen ánderin shyrqady.
«Búgingi tańda Astana bizdiń jas oryndaýshylar men kompozıtorlarymyz úshin arman qalaǵa aınalyp otyr. Olardyń árqaısysy úshin kásibı ánshilermen qatar elorda sahnasynda óner kórsetý zor mártebe», deıdi qazylar alqasynyń tóraǵasy, QR halyq ártisi Nurjamal Úsenbaeva.
Baıqaýdy uıymdastyrýshylardyń aıtýyna qaraǵanda, bas júldeni ıelengen ánshiniń kásibı turǵydaǵy beınebaıandy túsirýge múmkindigi bar.
Alǵash tusaýy kesilip otyrǵan baıqaýdy «Báıterek» halyqaralyq medıa ortalyǵy elorda ákimdigimen birlesip, uıymdastyrdy.
