Astana men Úrimshi arasynda jolaýshylar poıyzy qatynaıtyn boldy

ASTANA. 4 sáýir. QazAqparat - Astana turǵyndary Úrimshi qalasyna qaıtadan poıyzben qatynasatyn múmkindik aldy.

Bıylǵy jyldyń 6 sáýirinen bastap halyqaralyq «Astana - Úrimshi» temir jol qatynasy qalpyna keltiriledi. Bul týraly astana.kz saıty «Jolaýshylar tasymaly» AQ baspasóz qyzmetine silteme jasap habarlaıdy.

«Jolaýshylar tasymaly» AQ Úrimshi temir jol mekemesimen kelisý arqyly «Almaty-2 - Astana-Úrimshi» qatynasyndaǵy №13-54/14-53 eki toptyq halyqaralyq «Astana-Úrimshi» qatynasyndaǵy №54 jolaýshylar poıyzy qatynaıdy.

Kompanııanyń málimetinshe, quramnyń jolda júrý ýaqyty 39 saǵat 12 mınýt bolady. Poıyz Qaraǵandy, Aǵadyr, Moıynty, Balqash-2, Saıaq, Aqtoǵaı, Dostyq stansalarynda aıaldaıdy.

«Poıyz quramynda bes kýpelik vagon bar. №13/14 «Almaty-2 - Úrimshi» poıyzymen astanalyq quram senbi kúnderi Aqtoǵaı stansasynda birigedi. Osy jerde biriktirilgen 10 jolaýshy vagonynan turatyn quram Úrimshige 8 sáýirde kelip jetedi. Úrimshiden 9 sáýirde shyǵyp, Astanaǵa 10 sáýirde keledi», - delingen «Jolaýshylar tasymaly» AQ habarlamasynda.