Astana men Tashkent Ortalyq Azııa elderiniń basyn biriktirmek - sarapshy pikiri
«Astanada ótkeli otyrǵan Ortalyq Azııa elderi basshylarynyń keńesý májilisi aımaqtyń sońǵy jyldardaǵy mańyzdy oqıǵasy bolmaq. Kóshbasshylar bas qospaǵaly osy kezeń ishinde álem tez damyp, aıtýly ózgerister oryn aldy. Jyldam damyǵan álemde óńirlik máselelerde ózara keńesip, tájirıbesimen bólisip áreket etýdiń qajettiligi artyp otyr. Sońǵy eki jyl qatarynan Naýryz qarsańynda Ózbekstan memleketi basshysynyń Astanaǵa kelýi kóp jaıtty ańǵartady. Aımaq elderi kezdesýi Ózbekstannyń usynysymen, óńir elderiniń qoldaýymen Qazaqstanda ótýi elimiz bedeliniń aıqyn aıǵaǵy», - deıdi Janat Momynqulov.
Onyń paıymynsha, Ortalyq Azııa elderi Kóshbasshylarynyń aldaǵy keńesinde Qazaqstannyń dıplomatııalyq belsendiligi men Ózbekstandaǵy sońǵy ózgeristerdiń áserimen aımaqta qordalanǵan máseleler boıynsha joǵary deńgeıde pikir almasyp, óńirde yqpaldastyqtyń uzaq merzimdi strategııalyq negizderin qalyptastyrýǵa múmkindik bar.
«Aımaqtyń qos alyp memleketi osylaısha óńirdiń álemdegi sýbektiligin arttyratyn kóshbasshylyq tanytyp otyr. Básekelestiktiń ornyna belsendi pragmatızmdi basshylyqqa alǵan Tashkent pen Astana birtutas aǵzanyń músheleri ispettes aımaq elderiniń ustanymdaryn da eskerýge májbúr. Osy oraıda Ortalyq Azııanyń kelesheginde elimiz mıssııasynyń qandaı bolatynyn anyqtap alǵanymyz jón. Ol úshin tutas óńir men ondaǵy Ózbekstan, Qyrǵyzstan, Túrikmenstan jáne Tájikstannyń jeke orny, óz mıssııasy men ulttyq erekshelikterin eskerý aıryqsha mańyzdy», - dedi sarapshy.
Sarapshynyń aıtýynsha, birqatar ózekti salalarǵa qatysty sheshimderdi Ortalyq Azııa elderi birlese sheshim izdeýi qajet.
«Biz Ortalyq Azııanyń keleshegin qalaı kóremiz? Oǵan halyqtardyń kózqarasy qandaı? Olar neni basymdyq retinde kóredi? Mine, osy suraqtarǵa jaýapty birlesip izdeýimiz qajet. Óıtkeni bizdiń bir-birimizge kózqarasymyz ózgermese basqalardyń da nıeti ózgermeıdi. Mysaly, aımaǵymyzda túsinistik pen bereke-birlik bolmasa eshkim kelip elimizge ınvestıtsııa quımaıdy, ekonomıkany jáne óńirdiń bedelin kótermeıdi. Osy rette mádenı-gýmanıtarlyq baılanystardyńda máni asa zor. 2018 jyly elimizde Ózbekstan jyly bolyp jarııalanýy aıasynda Ózbekstan men Ortalyq Azııa elderine arnalǵan ǵylymı konferentsııa ótkizýge bolady», - dep túıindedi sózin Janat Momynqulov.
Aıta keteıik, erteń elordada Ortalyq Azııa elderi, sonyń ishinde Qazaqstan, Qyrǵyzstan , Tájikstan, Túrikmenstan jáne Ózbekstan Respýblıkalary basshylarynyń jumys (konsýltatıvtik) kezdesýi ótedi. Sol kúni N.Nazarbaev pen Sh.Mırzıeevtiń qatysýymen Qazaqstandaǵy Ózbekstan jylynyń saltanatty ashylý rásimi ótedi. Sondaı-aq, eki el kóshbasshylary óner qaıratkerleriniń gala-kontsertin tamashalaıtyn bolady.
