Astana men Tashkent yntymaqtastyǵy ózge elderge úlgi – Ózbekstannyń sý sharýashylyǵy mınıstri
TAShKENT. KAZINFORM – Tashkentte ótken sý dıplomatııasy taqyrybyna arnalǵan konferentsııa aıasynda Ózbekstannyń Sý sharýashylyǵy mınıstri Shavkat Hamraev Kazinform agenttiginiń menshikti tilshisine suhbat berip, Qazaqstanmen yntymaqtastyqty nyǵaıtýǵa múddeli ekenin málimdedi.
— Qazaqstan men Ózbekstan arasyndaǵy búgingi qarym-qatynas meni qýantady. Keıingi jyldary eki el arasynda sý sharýashylyǵy salasynda yntymaqtastyq nyǵaıyp keledi, nátıjeler jeterlik. Bul ózge memleketterge úlgi bolýy tıis. Biz bir-birimizdi bir aýyz sózden túsinetin deńgeıge jettik. Naqty esep pen ortaq boljamdar bar. Atap aıtqanda, qaı arna arqyly qansha sý alatynymyz, qansha kólemde sý beretinimizdiń barlyǵy tolyq kelisilgen, — dedi Shavkat Hamraev.
Mınıstrdiń aıtýynsha, sý dıplomatııasy qandaı da bir eldiń ulttyq múddesine kereǵar kelmeýi tıis. Shavkat Hamraevtyń paıymy keleshekte qabyldanýy yqtımal sheshimder barlyq taraptyń damýy men órkendeýi jolynda qyzmet etýi kerek degenge saıady.
— Biz aldaǵy ýaqytta transshekaralyq ózenderdiń boıyna salynatyn gıdrotehnıkalyq nysandardyń barshaǵa paıda ákelýi tıis ekenin eskerýimiz qajet. Osy oraıda Qazaqstan men Ózbekstan aqyldasa otyryp áreket etip keledi, — dep jaýap berdi Sh. Hamraev Kazinform tilshisiniń saýalyna.
Mınıstr málim etkendeı, resmı Tashkent sý resýrstaryn basqarý jáne ony tıimdi paıdalaný salasynda Astanamen yntymaqtastyqty ilgeriletýge nıetti.
— Kúni keshe Qazaqstan jańa Sý kodeksin qabyldady. Bul rette Ózbekstan da óziniń Sý kodeksin jańa redaktsııada maquldaýǵa nıetti. Qazir bul baǵytta jumys júrip jatyr. Tıisinshe, biz Qazaqstanmen yntymaqtastyqty bekemdeı túsemiz, biz oǵan múddelimiz, — dep túıindedi Ózbekstannyń Sý sharýashylyǵy mınıstri.
Eske salaıyq, búgin Ózbekstan astanasynda «Ortalyq Azııadaǵy sý dıplomatııasy: turaqty damýǵa negizdelgen senim, dıalog jáne yntymaqtastyq» taqyrybynda halyqaralyq ǵylymı-praktıkalyq konferentsııa ótti. Mundaı formattaǵy basqosýda alǵash ret Aýǵanstan delegatsııasy tóbe kórsetti.
Qosa ketsek, taıaýda QR Sý resýrstary jáne ırrıgatsııa mınıstri Nurjan Nurjigitov Ózbekstanda ótken Klımat forýmy aıasynda Kazinform tilshisine suhbat berip, sý tapshylyǵy máselesin sheshýge baǵyttalǵan jobalardyń barysyn baıandady. Atap aıtqanda, vedomstvo basshysy sýdy yntymaqtastyq qurý resýrsy retinde qarastyrýdyń mańyzyna toqtaldy.