Astana men Tashkent arasynda sheshimin tappaǵan birde-bir másele joq – Murat Nurtileý
ASTANA. KAZINFORM – Astana men Tashkent arasynda sheshimin tappaǵan bir de bir másele joq. Bul týraly elordada Ózbekstan Syrtqy ister mınıstri Bahtıer Saıdovpen keńeıtilgen quramdaǵy kelissózderden keıingi brıfıngte Premer-Mınıstrdiń orynbasary – Syrtqy ister mınıstri Murat Nurtileý aıtty.
«Búgin eki baýyrlas el – Qazaqstan men Ózbekstan qarym-qatynastary jylnamasyndaǵy taǵy da bir aıtýly kún. Qazaq eline alǵashqy ret resmı saparmen kelgen qadirli dosym, Ózbekstan Respýblıkasynyń Syrtqy ister mınıstri Bahtıer Saıdov myrzamen taǵy da kezdesýdiń sáti týǵanyna dán rızamyn. Osy tusta, biz erekshe mán beretin sapar aıasynda Astanaǵa at basyn tiregen ózbek delegatsııasyna shynaıy alǵysymdy bildiremin. Búgin de Ózbekstan – Qazaqstan úshin orny erekshe, senimdi odaqtas ári mańyzdy áriptes memleket. Tashkenttiń óńirdegi jáne álemdegi bedeli men róli jyldan-jylǵa artyp keledi. Biz ózbek eliniń kóptegen salalardaǵy tyń jetistikterin shynaıy nıetpen qabyldap, joǵary baǵalaımyz», - dedi Murat Nurtileý.
Osy oraıda ol eki eldiń bekem dostyǵynyń taǵy bir jarqyn kórinisi – joǵary deńgeıde ornatylǵan syndarly dıalog ekendigine nazar aýdartty.
«Atap aıtqanda, eki el kóshbasshylary - Qasym-Jomart Kemeluly Toqaev pen Shavkat Mıromonovıch Mırzıeevtiń arasyndaǵy baýyrlas ári ózara qoldaý rýhyndaǵy keń peıildi yqpaldastyǵy. 2022 jyly qol qoıylǵan Qazaqstan men Ózbekstan arasyndaǵy odaqtastyq qatynastar jáne shekarany demarkatsııalaý týraly tarıhı sharttar qazaq-ózbek baılanystarynyń jańa tuǵyrnamalyq paraǵyn ashty. Bul ekijaqty qujattardyń Ortalyq Azııa aımaǵyndaǵy turaqtylyqty qamtamasyz etýge jáne óńirdi órkendetýge eleýli úles qosatyny sózsiz», - dedi Syrtqy ister mınıstri.
Onyń atap ótýinshe, Qazaqstan men Ózbekstan Prezıdentteri deńgeıindegi Joǵary memleketaralyq keńes quryldy. Belsendi parlamentaralyq baılanystar saıası dıalogty nyǵaıtýǵa yqpal etýde. Úkimetaralyq deńgeıdegi turaqty baılanystar da yntymaqtastyqtyń únemi damýyna qýatty serpin berip otyr. Óńiraralyq forýmdar, sondaı-aq Іskerlik keńestiń qyzmeti ekonomıkalyq kún tártibin ilgeriletýge zor úles qosa kele jatyr.
«Naqtylasaq, eki eldiń arasynda búginge deıin sheshimin tappaǵan bir de bir másele joq dep aıtýǵa tolyq negiz bar», - dedi ol.
