Astana men Sofıevka aýylynyń arasynda avtobýs júretin boldy
ASTANA. QazAqparat - Sofıevka aýyly men Astana-Pavlodar avtojolynda ornalasqan saıajaı turǵyndary úshin jańa avtobýs iske qosyldy, dep habarlaıdy QazAqparat tilshisi Astana LRT kompanııasynyń Feısbýktegi paraqshasyna silteme jasap.
«Sofıevka aýylyn, sondaı-aq Astana-Pavlodar avtojolynda ornalasqan baý-baqsha qoǵamdastyqtaryn kólikpen qamtamasyz etý maqsatynda 2018 jyldyń 6 qazanynan bastap №317 jańa qala mańyna qatynaıtyn baǵdar iske qosylady», - delingen habarlamada.
Jańa avtobýs «Alaı saýda ortalyǵy» bastapqy aıaldamasynan bastap C-316 kóshesimen, sodan keıin Soltústik aınalma jolyna solǵa, Alash tas jolyna solǵa, odan ári baý-baqsha qoǵamdastyqtaryna jolshybaı toqtaýmen Sofıevka aýylyna deıin qatynaıdy.
«Qarama-qarsy baǵytta baý-baqsha qoǵamdastyqtaryna toqtamaıdy», - dep eskertedi kompanııa.
