Astana men Sıngapýr áriptestikti keńeıtýde
ASTANA. QazAqparat - Búgin Astana ákimi Baqyt Sultanov Sıngapýrdyń Qazaqstandaǵy Tótenshe jáne Ókiletti elshisi Zýlkıflı bın Baharýdınmen kezdesti, dep habarlaıdy elorda ákimdiginiń resmı saıty.
Kezdesý barysynda taraptar eki memleket basshylarynyń qoldaýynyń arqasynda saýda-ekonomıkalyq jáne mádenı-gýmanıtarlyq qarym-qatynasty damytý úshin barlyq jaǵdaı jasalǵanyna toqtala ketti.
B. Sultanovtyń aıtýynsha, Astana ákimdigi Sıngapýrmen iskerlik áriptestikti keńeıtýge úlken mán berip otyr. Eki el arasynda menedjment salasynda tájirıbe almasý ornatyldy. 2016 jyly qańtarda № 2 ındýstrıaldyq parkte sıngapýrlyq «Jurong Consultants» kompanııasy ázirlegen master-jospardyń tanystyrylymy ótken bolatyn.
«Qazir biz iri qalalardyń damý tájirıbesin zertteı otyryp, «Qazaqstan - 2050» strategııasymen jumys jasap jatyrmyz. Sıngapýrdyń tájirıbesi bizge óte paıdaly ári úlgi bolaryna senimdimin. Eger sizdiń osy salada sarapshylarmen áriptestik boıynsha ıdeıalaryńyz ben usynysyńyz bar bolsa, biz olarmen kezdesip, áriptes bolý múmkindigin talqylaımyz», - dedi Baqyt Sultanov.
Sondaı-aq B. Sultanov Astana halyqaralyq qarjy ortalyǵynyń jumysy bastalǵanyn, onyń Qazaqstanda qarjy ınfraqurylymynyń ıadrosyna aınalatynyn málimdedi.
Astana ákimi Sıngapýrdyń qarjy jáne ınvestıtsııalyq ınstıtýty AHQO jumysyna qatysady dep úmittenetinin aıtty. 2019 jyly 9-13 qyrkúıekte Astanada qalalyq týrızm boıynsha VIII ıÝNVTO sammıti jáne ІІ Jibek joly elderindegi qala merleriniń forýmy bolyp ótedi. Osyǵan baılanysty Baqyt Sultanov Sıngapýrdy joǵary deńgeıde ótetin atalmysh sharaǵa qatysýdy shaqyrdy.
