Astana men Shymkentte sottar biriktirildi

ASTANA. QazAqparat – Astana men Shymkent qalalarynda azamattyq jáne qylmystyq isterdi qaraıtyn aýdandyq sottar biriktirildi. QazAqparat bul týraly Joǵarǵy sottyń baspasóz qyzmetine silteme jasap habarlaıdy.

Memleket basshysynyń 2023 jylǵy 15 mamyrdaǵy №216 Jarlyǵymen Astana men Shymkent qalalaryndaǵy azamattyq jáne qylmystyq isterdi qaraıtyn aýdandyq sottar biriktirildi.

Sot ákimshiliginiń basshysy Naıl Ahmetzakırov Astana jáne Shymkent qalasy sottarynyń basshylyǵymen ótkizgen keńeste osy Jarlyqty iske asyrý máseleleri qaraldy.

Birinshi satydaǵy sottar (8-i Astanada jáne tórteýi Shymkentte) azamattyq jáne qylmystyq ıýrısdıktsııaly aýdanaralyq sottar bolyp qaıta quryldy. Tıisinshe qaıta uıymdastyrylǵan sottar tóraǵalarynyń laýazymdary sýdıa laýazymdary bolyp ózgertildi.

Astana boıynsha: Almaty, Esil, Saryarqa jáne Baıqońyr aýdandyq sottary azamattyq ister boıynsha aýdanaralyq sot bolyp (G. Álıev kóshesi, 6-úı), al Almaty, Saryarqa, Esil jáne Baıqońyr aýdandary boıynsha №2 sottar qylmystyq ister boıynsha aýdanaralyq sot bolyp biriktirildi (Kenesary kóshesi, 3-úı).

Shymkent boıynsha: Eńbekshi, Abaı, Ál-Farabı jáne Qarataý aýdandyq sottary tıisinshe azamattyq ister boıynsha aýdanaralyq sot bolyp (burynǵy Eńbekshi jáne Abaı sottarynyń ǵımarattarynda) jáne aýdanaralyq qylmystyq sot bolyp biriktirildi (Tynybaev kóshesi, 42-úı).

N. Ahmetzakırov atap ótkendeı, reforma sottylyq máseleleri boıynsha áýre-sarsańdy joıýǵa, júktemeni birkelki bólýge jáne biryńǵaı sot praktıkasyn qalyptastyrýǵa yqpal etedi.