Astana men Shanhaı arasynda tikeleı áýe reısteri ashylady
ASTANA. KAZINFORM - Qytaı Halyq Respýblıkasyna jumys sapary aıasynda QR KM Azamattyq avıatsııa komıtetiniń tóraǵasy Saltanat Tompıeva China Eastern Airlines áýe kompanııasynyń marketıng jáne satý jónindegi Aǵa vıtse-prezıdenti Chen Tszın myrzamen kezdesý ótkizdi.
QR Kólik mınıstrligi baspasóz qyzmetiniń habarlaýynsha, kelissózderdiń negizgi taqyryby Astana – Shanhaı baǵyty boıynsha tikeleı áýe qatynasyn ashý máselesi boldy. Áýe kompanııasynyń ókilderi atalǵan baǵytqa joǵary kommertsııalyq qyzyǵýshylyq tanytyp otyrǵanyn rastap, qajetti daıyndyq jumystaryn aıaqtaǵannan keıin bıylǵy kúzden bastap reısterdi iske qosýǵa daıyn ekenderin málimdedi. Bastapqy kezeńde reıster aptasyna úsh ret oryndalyp, keıinnen olardyń jıiligin kúndelikti reıske deıin arttyrý josparlanýda.
Kezdesý barysynda taraptar Qazaqstan men Qytaı arasyndaǵy baǵyttar jelisin odan ári keńeıtý perspektıvalaryn da talqylady. Áýe kompanııasynyń basshylyǵy Qazaqstanǵa oryndalatyn reıster sanyn kóbeıtýge, sondaı-aq qazaqstandyq áýe tasymaldaýshylarymen yntymaqtastyqty damytýǵa qyzyǵýshylyq bildirdi.
Jańa baǵyttyń ashylýy Qazaqstan men Qytaı arasyndaǵy áýe qatynasyn damytý jónindegi ýaǵdalastyqtardy iske asyrýdaǵy kezekti mańyzdy qadam bolmaq. Eki eldiń iskerlik jáne saıası ortalyqtaryn tikeleı áýe qatynasymen baılanystyrý týrıstik, iskerlik jáne ınvestıtsııalyq baılanystardyń odan ári nyǵaıýyna, sondaı-aq Qazaqstannyń tranzıttik áleýetin keńeıtýge yqpal etedi.
Osyǵan deıin Qazaqstan men Qytaı arasyndaǵy áýe reısteri aptasyna 152-ge deıin kóbeıetini týraly jazdyq.
