Astana men Pnompen «baýyrlas qalalar» atandy
ASTANA. KAZINFORM — Qazaqstan men Kambodja tsıfrlyq úkimet, saýda, mádenıet jáne týrızm salalaryndaǵy yntymaqtastyqty keńeıtedi. Eki eldiń astanalary — Astana men Pnompen arasynda baýyrlastyq baılanys ornatý týraly memorandýmǵa qol qoıyldy.
Aqordada Memleket basshysy Qasym-Jomart Toqaev pen Kambodja Premer-mınıstri Hýn Manettiń qatysýymen úkimetaralyq jáne vedomstvoaralyq qujattar almasý rásimi ótti. Nátıjesinde eki el arasyndaǵy áriptestikti birneshe baǵytta damytýǵa arnalǵan 6 memorandým bekitildi.
Qujattardyń biri tsıfrlyq tehnologııalar salasyndaǵy yntymaqtastyqty kózdeıdi. QR Jasandy ıntellekt jáne tsıfrlyq damý mınıstrligi men Kambodjanyń Poshta jáne telekommýnıkatsııalar mınıstrligi ózara túsinistik týraly memorandýmǵa qol qoıdy.
Sonymen birge Jasandy ıntellekt jáne tsıfrlyq damý mınıstrligi, «Ulttyq aqparattyq tehnologııalar» aktsıonerlik qoǵamy men Kambodjanyń Іshki ister mınıstrligi tsıfrlyq úkimet, GovTech jáne aqparattyq-kommýnıkatsııalyq tehnologııalar salalarynda birlesip jumys isteýge ýaǵdalasty.
Kezdesýde saýda-ekonomıkalyq baılanystardy damytýǵa da basymdyq berildi. Osy maqsatta Qazaqstannyń Saýda jáne ıntegratsııa mınıstrligi men Kambodjanyń Saýda mınıstrligi arasynda ózara túsinistik týraly memorandým jasaldy.
Mádenıet pen óner salasyndaǵy yntymaqtastyqty Qazaqstannyń Mádenıet jáne aqparat mınıstrligi men Kambodjanyń Mádenıet jáne kórkem óner mınıstrligi birlesip damytýdy kózdeıdi. Al týrızm baǵytyndaǵy áriptestik eki eldiń tıisti mınıstrlikteri arasynda jasalǵan memorandýmmen bekitildi.
Rásimdegi mańyzdy qujattardyń biri — Astana men Pnompen qalalary arasynda baýyrlastyq baılanys ornatý týraly memorandým. Bul kelisim eki eldiń astanalary arasyndaǵy tikeleı yntymaqtastyqty damytýǵa negiz qalaıdy.
Aıta keteıik, búgin Aqordada Memleket basshysy Qasym-Jomart Toqaev Kambodja Koroldiginiń Premer-mınıstri Hýn Manetti qarsy aldy.
Prezıdent Qasym-Jomart Toqaev Kambodjany Qazaqstannyń Ońtústik-Shyǵys Azııadaǵy senimdi seriktesi dep atady.
Qos memleket energetıka jáne elektrondy úkimet salasynda yntymaqtastyqty keńeıtpek.
