Astana men Pavlodarda 268 tekshe metr aǵash materıalynan qaýipti qońyz anyqtaldy
ASTANA. KAZINFORM — Aýyl sharýashylyǵy mınıstrliginiń Agroónerkásiptik keshendegi memlekettik ınspektsııa komıtetiniń aýmaqtyq bólimsheleri memlekettik fıtosanıtarııalyq baqylaý júrgizý barysynda Aqtóbe, Batys Qazaqstan, Jambyl, Pavlodar jáne Túrkistan oblystarynda, sondaı-aq Astana qalasynda Qazaqstan aýmaǵyna qaýipti karantındik organızmderdi kirgizýge jol bermedi. Bul týraly vedomstvonyń baspasóz qyzmeti málim etti.
Tekserý barysynda ınspektorlar zerthanalyq zertteý júrgizý úshin synamalar aldy.
Mınıstrliktiń dereginshe, «Fıtosanıtarııa» sharýashylyq júrgizý quqyǵyndaǵy respýblıkalyq memlekettik kásipornynyń oblystyq fılıaldary júrgizgen saraptama nátıjesinde ónimniń jekelegen partııalarynan aýyl sharýashylyǵy jáne orman alqaptaryna qaýip tóndiretin karantındik nysandar anyqtaldy.
Atap aıtqanda, Astana qalasy men Pavlodar oblysynda kólemi 268 tekshe metr orman jáne aǵash materıaldarynan qaraǵaı súrekshi qońyzynyń (Monochamus galloprovincialis) zalaldaýy rastaldy.
Batys Qazaqstan oblysynda jalpy salmaǵy 397 tonnadan asatyn dándi jáne maıly daqyldar partııalarynan, onyń ishinde arpa, maqsary jáne zyǵyrdan karantındik aramshópter — aşy jýsan jáne suńǵyla anyqtaldy.
Jambyl oblysynda 1 tonna jas órikten shyǵys jemis jemiri (Grapholita molesta) men kalıfornııalyq qalqansha symyry (Diaspidiotus perniciosus) tabyldy.
Aqtóbe oblysynda salmaǵy 0,8 tonna aısberg salatynyń partııasynan batys gúl trıpsi (Frankliniella occidentalis) anyqtaldy.
Sonymen qatar, Túrkistan oblysyndaǵy «B. Qonysbaev» ótkizý beketinde Ózbekstan Respýblıkasynan ákelingen jalpy salmaǵy 1,55 tonna eki anar partııasynan Komstok symyry tabyldy.
— Ózbekstannan, Qyrǵyzstannan jáne Reseıden jetkizilgen zalaldanǵan karantınge jatqyzylǵan ónim eksporttaýshy elderge keri qaıtaryldy. Fıtosanıtarııalyq talaptardy buzǵan tulǵalarǵa qatysty ákimshilik quqyq buzýshylyq týraly ister qozǵaldy. Materıaldar sot organdaryna joldanyp, nátıjesinde ákimshilik aıyppuldar salyndy, — delingen habarlamada.
Agroónerkásiptik keshendegi memlekettik ınspektsııa komıteti aýyl sharýashylyǵy ónimderin ımporttaýshylar men jetkizýshilerge fıtosanıtarııalyq talaptardy qatań saqtaýdyń qajettigin eskertedi.
Karantınge jatqyzylǵan ónimdi ákelý jáne tasymaldaý kezinde belgilengen talaptardy saqtaý Qazaqstan aýmaǵyna qaýipti karantındik organızmderdiń enýin der kezinde anyqtap, olardyń taralýyna jol bermeıdi. Bul — eldiń fıtosanıtarııalyq qaýipsizdigin qamtamasyz etý jolyndaǵy mańyzdy sharalardyń biri.
Aıta keteıik, buǵan deıin Astanada fıtosanıtarııalyq talaptardy buza otyryp ákelingen sándik ósimdikter joıylǵanyn jazdyq.
