Astana men Parıj strategııalyq mıneraldar boıynsha jańa kelissózder kezeńin bastady
ASTANA. KAZINFORM — Qazaqstan men Frantsııa strategııalyq shıkizat salasyndaǵy yntymaqtastyqty kúsheıtpekshi, dep habarlaıdy Ónerkásip jáne qurylys mınıstrligi.
Qazaqstan men Frantsııa strategııalyq mańyzdy shıkizat materıaldary salasyndaǵy yntymaqtastyq jónindegi birlesken jumys tobynyń alǵashqy otyrysyn ótkizdi. Beınekonferentsııa formatynda ótken kezdesýde taraptar geologııalyq barlaý, shıkizatty óńdeý jáne taý-ken ónerkásibin damytý baǵytyndaǵy ózara is-qımyldy talqylady.
Otyrys Qazaqstan–Frantsııa úkimetaralyq komıssııasynyń 2025 jylǵy jeltoqsandaǵy kelisimderin iske asyrý aıasynda uıymdastyryldy. Kezdesýge QR Ónerkásip jáne qurylys mınıstrligi Ónerkásip komıteti tóraǵasynyń orynbasary Oljas Álibekov pen Frantsııanyń mıneraldyq shıkizat jáne metaldarmen strategııalyq qamtamasyz etý jónindegi vedomstvoaralyq delegaty Benjamen Gallezo teń tóraǵalyq etti.
Taraptar geologııalyq kartografııa, derekter almasý, zerthanalyq zertteýler, jer qoınaýyn paıdalaný jáne zamanaýı taý-ken óndirisin damytý máselelerin qarastyrdy. Sondaı-aq tıtan men ózge de strategııalyq resýrstardy jetkizý, bıznes ókilderi arasyndaǵy tikeleı baılanystardy keńeıtý máselelerine erekshe nazar aýdaryldy.
Kezdesý barysynda Oljas Álibekov Qazaqstannyń Eýropalyq odaqtyń strategııalyq mańyzdy shıkizat materıaldary tizimine engen 34 resýrstyń 21 túrin óndirip, óńdeıtinin atap ótti. Sonymen qatar eldegi ınvestıtsııalyq ahýaldy jaqsartý jáne jer qoınaýyn paıdalaný salasyn tsıfrlandyrý boıynsha júrgizilip jatqan jumystar tanystyryldy.
Qazaqstandyq tarap frantsııalyq seriktesterdi geologııalyq barlaý, shıkizatty tereń óńdeý jáne jańa tehnologııalardy engizý baǵytyndaǵy birlesken jobalarǵa belsendi qatysýǵa shaqyrdy.
Kezdesý qorytyndysynda eki el ókilderi uzaq merzimdi strategııalyq áriptestikti odan ári nyǵaıtýǵa jáne birlesken bastamalardy júzege asyrýdy jalǵastyrýǵa daıyn ekenderin málimdedi.
Osyǵan deıin Qazaqstan men Frantsııa atom energetıkasy salasyndaǵy yntymaqtastyqty keńeıtetinin jazǵanbyz.
